یو شمېر ایراني پانګوال چمتو دي چې د کور او ښار جوړولو برخو کې پانګونه وکړي
۱۴۴۵/۱۱/۰۵
د کور او ښار جوړولو وزارت محترم سرپرست وزیر شیخ حمدالله نعماني، په خپل کاري دفتر کې د ایران هېواد د سنپو ساختماني شرکت له مسؤلینو سره وکتل.
د یاد شرکت مسؤلینو یادونه وکړه، چې دوی چمتو دې افغانستان کې د سرپناه او ښاري پراختیا برخه کې پانګونه وکړي او په خبره یې یاده برخه کې د نورو یو شمېر هېوادونو کافي تجربه لري.
د کور او ښار جوړولو وزارت محترم سرپرست وزیر شیخ حمدالله نعماني، یادو پانګوالو ته د ښه راغلاست ترڅنګ د سرپناه او ښاري پراختیا برخه کې د پانګونې په اړه هر اړخیز معلومات ورکړل.
شیخ حمدالله نعماني، ډاډ ورکړ، چې د کور او ښار جوړولو وزارت ټولو کورنیو او بهرنیو پانګوالو ته د هېواد په ټولو ولایتونو کې د کورونو، ښارګوټو او ښاري پراختیا برخه کې د پانګونې لپاره اسانتیاوې برابرې کړي او ملاتړ یې کوي.
ښاغلي نعماني، له ایراني پانګوالو وغوښتل چې خپلې غوښتنې او په افغانستان کې د پانګونې په پار دې لومړنۍ چارې په کابل کې د ایران له سفارت پیل کړي، چې په خبره یې هغوی به پانګوال د افغانستان د بهرنیو چارو وزارت ته ور وپېژني، د شرکت په اړه به بشپړ معلومات ورکړي او له هغه ځایه به د کور او ښار جوړولو وزارت ته راجع شي.
د سنپو ساختماني شرکت مشر وایي، د ایران په ګډون یې عمان، ازبکستان، عراق او نورو هېوادونو کې، د ښارګوټو، سړکونو، د اوبو د بندونو او نورو ساختماني پروژو کې کار کړی او کافي تجربه لري.
د کور او ښار جوړولو وزارت دروازې د ټولو داخلي او بیروني پانګوالو پر مخ پرانستې دي، اسانتیاوې یې ورته برابرې کړي او د هر هغه چا ملاتړ کوي چې غواړي د یاد وزارت په اډانه کې د سرپناه، ښارګوټو او ښاري پراختیا برخه کې پانګونه وکړي.
