یو شمېر پانګوالو د کور جوړولو په برخه کې خپله لېوالتیا څرګنده کړه
16/02/1444
د ښار جوړولو او ځمکو وزارت سرپرست محترم مولوي حمدالله نعماني له یو شمېر کورنیو پانګوالو سره وکتل او د ښار جوړولو او ځمکو وزارت په پروژو کې یې د پانګونې او د ګډو همکاریو په اړه یې خبرې وکړې.
په دې کتنه کې پانګوالو د خپلو فعالیتونو او د ښار جوړولو او ځمکو وزارت سره د همکارۍ په اړه خبرې وکړې او زیاته یې کړه، دوی چمتو دي چې د دغه وزارت په پروژو کې پانګونه وکړي.
د ښار جوړولو او ځمکو وزارت سرپرست له هغو پانګوالو څخه چې د دغه وزارت په کور جوړولو او ساختماني پروژو کې پانګونه کوي، ملاتړ وکړ وې ویل: دغه وزارت د ټولو هغو ملي او نړیوالو سوداګرو او پانګوالو هرکلی کوي چې غواړي د دغه وزارت په پروژو کې پانګونه وکړي.
هغه وويل، د ښار جوړولو او ځمکو وزارت د دغه وزارت په پروژو کې د ټولو پانګوالو لپاره چاپېريال برابر کړى او هغوى ته يې لازم امنيت او اسانتياوې برابرې کړې دي.
د ښار جوړولو او ځمکو وزارت سرپرست محترم مولوي حمدالله نعماني همدارنګه وویل:
چې په مرکز او ولایتونو کې د کور جوړولو او ودانیزې ګڼې پروژې پانګونې ته چمتو دي او په ځینو پروژو کې د نوي کابل په ګډون د زیربنایي دبرخو چارې بشپړې شوي او د عملي کېدو لپاره چمتو دي.
