د ښاري سرغړونو د مخنیوي او د پروژو پر تطبیق د څار عمومي ریاست پلاوي، ننګرهار ته سفر وکړ
۱۴۴۷/۹/۱
د کور او ښار جوړولو وزارت د محترم مقام په هدایت او لارښوونه، د دغه وزارت د د ښاري سرغړونو د مخنیوي او د پروژو پر تطبیق د څار عمومي ریاست تخنیکي ټیم ننګرهار ولایت ته سفر وکړ.
د دغه سفر اساسي موخه د یاد ولایت په کچه د دې ریاست د دوهمو او درېیمو واحدونو د کړنو، کاري بهیرونو او د فعالیتونو د پرمختګ کچې هر اړخیزه ارزونه او څارنه ده.
په دغه سفر کې به، د برنامو د تطبیق بهیر د تخنیکي اصولو، نافذه قوانینو او مقرراتو په رڼا کې په اغېزمن، شفاف او منظم ډول وارزول شي.
تللي پلاوي د ننګرهار ولایت د شینوار ولسوالۍ، سره رود ولسوالۍ، ګوشته ولسوالۍ او کامه ولسوالۍ ویزه شوي ښاري پلانونه په دقت سره وارزول.
سربېره پر دې، د جلال اباد ښار ښاري پلانونه، چې درې ماسټرپلانونه او ۳۳ تفصیلي او ستراتیژیک پلانونه پهکې شامل دي، په تفصیلي ډول تحلیل او و ارزول.
ورپسې، د اسنادو او پلانونو له ارزونې وروسته، د روښان مېنې ښارګوټي پلان له واقعي جغرافیایي ځانګړتیاو سره وتړل شو او د ځمکې پر اصلي موقعیت برابر کړای شو.
د ترسره شوې څارنې په پایله کې یو شمېر د پام وړ سرغړونې تشخیص او تثبیت شوي چې بشپړ او مستند راپور به یې د لازم تصمیم نیولو لپاره د کور او ښار جوړولو وزارت له محترم مقام سره شریک شي.
