د کابل ښار په نهمه ناحیه کې د محب ټاور له ودانۍ څخه د تخنیکي څارنې بهیر پیل شو
1447/12/29
د ښاري تخلفاتو د مخنیوي او د ساختماني پروژو د تطبیق د کنټرول عمومي ریاست اړوند د ښاري تخلفاتو د مخنیوي ریاست تخنیکي ټیمونو، د کابل ښار د نهمې ناحیې اړوند د محب ټاور له ودانۍ څخه تخنیکي څارنه پیل کړه.
د ساحوي څارنې پر مهال د ودانیو اړوند لازم معلومات او تخنیکي معلومات راټول شول او هغه موضوعات چې لا زیاتې تخنیکي ارزونې او څېړنې ته اړتیا لري، ثبت او مستند شول.
د محب ټاور د ودانۍ د ارزونې او څارنې بهیر به په راتلونکو ورځو کې هم دوام ومومي او له بشپړو تخنیکي څېړنو وروسته به اړوند راپور د لازمې پرېکړې لپاره د کور او ښار جوړولو وزارت محترم مقام ته وړاندې شي.
همدارنګه د ښاري تخلفاتو د مخنیوي او د ودانیزو پروژو د ارزونې لړۍ د کاري پلان له مخې په دوامداره توګه روانه ده او د کابل ښار نور استوګنیز ښارګوټي، استوګنیزې او سوداګریزې پروژې به هم د ټاکل شوي پروګرام له مخې تر تخنیکي څارنې او ارزونې لاندې ونیول شي.
د دغو څارنو موخه د ښاري پلانونو د سم تطبیق ډاډمنول، د غیرمعیاري ګڼې ګوڼې مخنیوی، د ودانیزو چارو د کیفیت لوړول او د ښاري مدیریت پیاوړتیا ده.
