د غزني ولایت په اب بند ولسوالۍ کې د مسجد شریف د رغونې او ترمیم له چارو څارنه
۱۴۴۷/۴/۱۸
غزني ولایت کې د کور او ښار جوړولو ریاست محترم رئیس مولوي نور ولي بلال متقي وایي، د دغه ولایت په اببند ولسوالۍ کې د مسجد شریف بېلا بېلې رغنیزې او ترمیماتي چارې په منظم ډول جریان لري، چې تخنیکي ټیم یې ترې څارنه وکړه.
ښاغلی مولوي بلال متقي وایي، یاد مسجد شریف د ښځینه وو لپاره دی، چې په داخلي برخه کې یې د دېوالونو د کاشي ډبرو لګولو چارې روانې دي او په خبره یې هغه مسجد شریف چې د نارینه وو لپاره دی، د ازادې ساحې او تزئیني دروازو د پلستر چارې یې روانې دي.
نوموړی وایي، سربېره پر دې، د نارینه مسجد شریف په بام باندې ایزوګام هم ترسره کېږي او د د دواړو مسجدونو د اودس کولو د ځای د کاشي ډبرو لګولو چارې روانې دي.
دغه راز هغه زیاته کړه، د منارونو د سیخ تړلو او قالب تړلو چارې هم په چټکۍ سره پرمخ روانې دي او د نارینه وو لپاره د مسجد په داخلي برخه کې د برېښنا لین غځول روان دي، چې ترڅنګ یې د برنډې د ډبرې اېښودلو او هنګاف کار هم تر سره کیږي.
ښاغلی مولوي بلال متقي وایي، د سپټیک، چاڼ خونې او د اوبو د ذخیرې ځایونو چاپېره د هم ودانیزې چارې دوام لري.
