د کور او ښار جوړولو وزارت د موټرو د (جي، پي، ایس) تعقیبي سیسټم قرارداد لاسلیک شو

۱۴۴۸/۱/۱۳

د کور او ښار جوړولو وزارت د وسایطو د اغېزمن مدیریت، شفافیت او خوندیتوب د پیاوړتیا په موخه، د وزارت د موټرو د (جي، پي، ایس) تعقیبي سیسټم د نصب او فعالولو قرارداد د ( تکتاز) خصوصي شرکت سره، د دغه وزارت د محترم مالي او اداري معین مولوي محمد رباني ناصح له لوري لاسلیک شو.

د دغه قرارداد له مخې به، د وزارت پر ټولو اړوندو وسایطو د GPS عصري تعقیبي سیسټم نصب او فعال شي، ترڅو د موټرو د تګ راتګ مسیرونه او د استفادې څرنګوالی په دقیق او اغېزمن ډول وڅارل شي.

دغه سیستم به، د غیر ضروري او شخصي تګ راتګ مخه ونیسي، د تېلو د مصرف د کنټرول او سپما زمینه به برابره کړي، د موټرو د خوندیتوب کچه به لوړه کړي او د غلا یا غیرقانوني استفادې په صورت کې به د وسایطو د چټک موندلو او تعقیب اسانتیا رامنځته کړي.

همدارنګه، دا سیستم به د وسایطو د مدیریت، راپور ورکولو او څارنې بهیر لا اغېزمن او شفاف کړي.

د کور او ښار جوړولووزارت محترم مالي او اداري معین مولوي محمد ریاني ناصح، د دې قرارداد لاسلیک د عامه شتمنیو د خوندي ساتنې، د دولتي امکاناتو د اغېزمنې استفادې، د لګښتونو د راکمولو او د حساب ورکولو د پیاوړتیا په برخه کې یو مهم ګام وباله او ټینګار یې وکړ، چې د نوې ټکنالوژۍ کارول به د ادارې د عصري مدیریت او ښه حکومتولۍ له موخو سره د رسېدو په برخه کې مهم رول ولوبوي.