بامیان ولایت کې د مهاجرو ښارګوټی پرانیستل شو
۱۴۴۷/۴/۴
د کور او ښار جوړولو وزارت محترم وزیر الحاج مولوي نجیب الله حیات حقاني، او د یاد وزارت د ښاري چارو محترم مرستیال شیخ مدارعلي کریمي بامیاني، د بامیان ولایت محترم والي مولوي عبدالله سرحدي، امنیه قوماندان الحاج حبیبالله شاکر او یو شمېر مسؤلینو او د سیمې د اوسیدونکو په شتون کې د مهاجرو ښارګوټی پرانیستل شو.
د کور او ښار جوړولو وزارت محترم وزیر الحاج مولوي نجیب الله حیات حقاني، د مهاجرو ښارګوټي د پرانیستې په مراسمو کې وویل، د دې ښارګوټي تفصیلي پلان د وزارت له لوري د انجنیرۍ او ښاري معیارونو پر بنسټ ترتیب شوی، او د تطبیق وروسته به د استوګنې نمرې په عادلانه او شفاف ډول بېرته راستنېدونکو مهاجرو ته ووېشل شي.
ښاغلي وزیر وویل، یوه ګډه کاري کمیټه له اړوندو وزارتونو او ولایتي مسؤلینو جوړه شوې چې د مهاجرو ښارګوټو د استوګنې د نمرې د عادلانه او شفاف وېش څارنه او پلي کول پر غاړه لري.
د ښاري چارو محترم مرستیال شیخ مدارعلي کریمي بامیاني وویل، د مهاجرو ښارګوټی ځانګړی اهمیت لري، ځکه چې ډېری هېوادوال بېرته هېواد ته راستانه شوي او د سرپناه اړتیا لري.
ښاغلي بامیاني وویل، وزارت د یادو ښارګوټو د نمرو وېش ته پوره چمتووالی نیولی چې په شفاف او عادلانه توګه به ووېشل شي.
د بامیان محترم والي مولوي عبدالله سرحدي، د کور او ښار جوړولو وزیر او مل پلاوي ته د ښه راغلاست ترڅنګ مننه وکړه چې پّ دغه ولایت کې یې د مهاجرو ښارګوټي پرانیسته وکړه.
ښاغلي والي مولوي عبدالله سرحدي، یاده چاره د بامیان ولایت د خلکو لپاره یوه مهمه لاسته راوړنه وبلله او زیاته یې کړه، د خوښۍ ورځ ده چې د ژوند د اړتیاوو د پوره کولو بنسټیزې او حیاتي پروژې پیل شوې.
په دغه مراسمو کې ځایي خلکو د کور او ښار جوړولو له وزارت مننه وکړه چې د سرپناه برابرولو برخه کې یې ستر ګام اوچت کړ.
دوی وویل، د مهاجرو د ښارګوټي پرانیسته او جوړېدل د بېسرپناه کورنیو لپاره یوه لویه لاسته راوړنه ده.
په بامیان ولایت کې د مهاجرو ښارګوټی، ۴۲۰ جریبه مساحت لري، د مرکز بامیان د "اژدر" په سیمه کې جوړ شوی، چې ۳۸۱ مستحقو کورنیو ته به په کې د استوګنې زمینه برابره شي.
