پروان ولايت کې د دوو ټولګټو پروژو د تطبيق چارې پيل شوې
ښار جوړولو او ځمکو وزارت د پروان ولايت په مرکز چاريکار ښار کې د کوټوالي جومات او په لقماني قريه کې د امسلمه ښځينهو ښوونځي د رغولو چارې پيل کړې.
د ښځينهو ياد ښوونځی په ۳۸۴ متر مربع ځمکه کې په دوه پوړيز ډول په ۱۳ ميلیونه ۹۰۰ زره افغانيو او ياد جومات چې په يو وخت کې په کې ۶۰۰ کسان لمونځ کولای شي، په ۳۲۰ متر مربع ځمکه کې په دوه پوړيز ډول د ښار جوړولو او ځمکو وزارت له بوديجې څخه په ۲۴ ميلیونه ۲۰۰ زره افغانيو رغول کيږي.
ښار جوړولو او ځمکو وزارت غواړي د دولت پراختيايي پروژو او د ټولګټو پروژو د رغونې لړۍ له چټکتيا سره؛ هېوادوالو ته د وړاندې کېدونکو خدماتو په کچه کې ښهوالی راولي او د خلکو د ژوند کچه لوړه شي.
