تورخم کې د بېرته راستنېدونکو کډوالو کمپ کې د کاري کمېټو لپاره اساسي دفترونه جوړېږي
۱۴۴۶/۰۱/۰۳
ننګرهار ولایت کې د کور او ښار جوړولو ریاست محترم رئیس مولوي نبي الله سعید وایي، د تورخم ښارګوټي اړوند د بېرته راستنېدونکو کډوالو په عمري کمپ کې د کاري کمېټو او امنیتي پرسونل لپاره پاخه او اساسي دفترونه جوړېږي.
ښاغلی مولوي نبي الله سعید وایي، په همدې موخه یې د دغه ریاست اړوند تخنیکي ټیم د تورخم ښارګوټي ته استولی و، چې هلته د یادې چارې د ترسره کولو په موخه خط اچونه وکړي.
نوموړی وایي، د یادو ساختمانونو د جوړولو لپاره د خط اچونې بهیر بشپړ شو، چې په خبره یې د کاري کمېټو لپاره پنځه دفترونه چې د اړتیا وړ نور ځایونه هم لري او دغه راز د امنیتي ساتونکو د اوسېدو لپاره خونې شاملې دي.
محترم مولوي سعید وایي، په ټوله کې شپاړس (۱۶) ساختمانونه دي چې ټاکل شوې د دوه میاشتو په موده کې به بشپړ او ګټې اخیستنې ته وسپارل شي.
