په هېواد کې د پانګونې د جذب او تسهیل لپاره څلور اړخیزه هوکړه لیک لاسلیک شو
په هېواد کې د پانګونې د جذب او تسهیل لپاره څلور اړخیزه هوکړه لیک د ښار جوړولو او ځمکو وزارت، د صنعت او تجارت وزارت، د افغانستان د خونو فدارسیون او د پانګونې د اسانتیا واحد ترمنځ لاسلیک شو.
دا هوکړه لیک، د کورني او بهرني پانګونې د جذبولو، په هېواد کې د پانګونې لپاره د لازمو اسانتیاو د برابرولو او په مهمو پروژو کې د خصوصي سکټور د مشارکت او همکارۍ د کچې د لوړولو او پیاوړتیا په موخه لاسلیک شو.
د دې هوکړه لیک له مخې، ښار جوړولو او ځمکو وزارت د صنعت او تجارت وزارت سره په همغږۍ د پانګونې لپاره د ۵۰ پروژو په تړاو بشپړ معلومات او جزییات د پانګونې په موخه د خصوصي سکټور په واک کې ورکوي.
همدارنګه د دې هوکړه لیک پر بنسټ، د افغانستان د خونو فدراسیون او د پانګونې د اسانتیا واحد د رسنیو، سیمنارونو، ورکشاپونو، کنفرانسونو، ناستو، ګردي میزونو او نورو ممکنه لارو څخه په استفادې په هېواد کې د خصوصي سکټور د هڅونې او د پانګونې د جذب لپاره اړین فرصتونه برابروي.
په پام کې ده، د دې هوکړه لیک د ښه تطبیق لپاره د څلورو ادارو لوړ پورو چارواکو په ګډون یوه ګډه کمیټه هم رامنځته شي.
ښار جوړولو او ځمکو وزارت د اړونده ادارو سره په همغږۍ، د دولتي ځمکو او املاکو څخه د سمې استفادې لپاره، په دې وروستیو کې ۵۰ د سرمایه ګذارۍ پروژې د هېواد په ۷ ولایتونو (ننگرهار، لغمان، هرات، کابل، کندهار، بلخ و خوست) کې ځانګړي کړي چې په پلي کېدو سره به یې، د خصوصي سکټور له لوري ۲.۷ میلیارده امریکايي ډالره پانګونه ترسره شي، ۲ میلیارده امریکايي ډالره د دولت عواید زیات شي او زرګونو هېوادوالو ته کاري او اقتصادي فرصتونه برابر شي.
