ښار جوړولو او ځمکو وزارت سرپرست وزیر د ارزګان له والي سره وکتل
ښار جوړولو او ځمکو وزارت سرپرست وزیر محترم محمود کرزی د ارزګان له والي محرم محمد شفیق اسد الله سعید سره وکتل او په یاد ولایت کې د پراختیايي او ټولګټو پروژو د تطبیق پر څرنګوالي خبرې وکړې.
په سر کې، د ارزګان والي د یاد ولایت د اقتصادي، ټولنیز، امنیتي او تعليمي وضعیت په اړه خبرې وکړې او د ښار جوړولو او ځمکو وزارت د مشرتابه څخه یې وغوښتل چې د ټولګټو پروژو د تطبیق په برخه کې یاد ولایت ته ځانګړې پاملرنه وکړي.
ارزګان والي په دې لیدنه کې په مشخصه توګه د ښار جوړولو ریاست پر تجهیز، د خیرو کاریز د ښارګوټي تفصیلي پلان پر تطبیق، د ټولګټو پروژو د تطبیق لپاره د ځمکې لېږد، د نوي ارزګان ښار پر جوړونې، د ولایت اداري کمپلکس د جوړېدو لپاره د ځمکې انتقال، د ولسوالیو د انکشافي پلانونو پر ترتیب او د کجکي بند د استملاک د ستونزې پر حل خبرې وکړې او د یادو موضوعاتو د ښه تطبیق لپاره د همکارۍ غوښتنه وکړه.
ورپسې، د ښار جوړولو او ځمکو وزارت سرپرست وزیر محترم محمود کرزی ارزګان یې یو له مهمو ولایتونو څخه وباله او زیاته یې کړه چې یاد وزارت د پراختیايي او ټولګټو پروژو تطبیق ته ژمن دی چې پایله یې اقتصادي وده او د خلکو هوساینه وي.
د ښار جوړولو او ځمکو وزارت سرپرست وزیر اړونده مسوولینو ته لارښونه وکړه چې ډېر ژر د انجنیرانو او سرویرانو یو پنځه کسیز ټیم سره له تخنیکي وسایلو یاد ولایت ته توظیف کړي.
همدارنګه، د ښاري چارو معینیت ته دنده وسپارل شوه ترڅو د خیرو کاریز د ښارګوټي تفصیلي پلان دې د ترینکوټ له ښاروال سره په ګډه ارزیابی کړي او د سیمې د خلکو له موافقې وروسته دې منظور شي.
په همدې ترتیب، د ښار جوړولو او ځمکو وزارت سرپرست وزیر د ارزګان له والي څخه وغوښتل چې د ټولګټو پروژو د تطبیق او اداري کمپلکس د جوړېدو لپاره د ځمکو د انتقال په اړه مشخص وړاندیزونه ترتیب او یاد وزارت ته یې د رسمي پړاوونه د ترسره کولو لپاره واستوي.
د ارزګان د نوي ښار او د ولسواليو د انکشافي پلانونو د ترتیب په موخه، د ښاري چارو معینیت ته دنده وسپارل شوه ترڅو ژر تر ژره د تخنیکي سروې ټیمونه دې ارزګان ولایت ته واستوي ترڅو د تخنیکي سروې په پایله کې د ارزګان نوي ښار او ولسوالیو پراختیایي پلانونه ترتیب شي.
د دې لیدنې په پای کې د ارزګان ولایت منطقوي پلان د ښار جوړولو او ځمکو وزارت سرپرست وزیر او د ارزګان والي له خوا لاسلیک شو.
###
