په بغلان ولایت کې د راستنو شویو مهاجرینو د اتحاد (صلح) ښارګوټي د توپوګرافي سروې چارې پیل شوې
۱۴۴۷/۱۲/۲۴
د کور او ښار جوړولو وزارت د سروې او جي ای ایس ریاست تخنیکي او مسلکي ټیم له لوري د بغلان ولایت د ډنډغوري ولسوالۍ اړوند د خواجه الوان دښتې په سیمه کې د راستنو شویو مهاجرینو لپاره د اتحاد (صلح) ښارګوټي د توپوګرافي سروې چارې پیل شوې.
په یاده سروې کې به ۲۹۱۱ جریبه ځمکه تر پوښښ لاندې ونیول شي، چې موخه یې د راستنو شویو مهاجرینو لپاره د معیاري او منظم ښارګوټي د جوړېدو په پار د تخنیکي معلوماتو راټولول او د اساسي پلان د ترتیب لپاره زمینه برابرول دي.
د توپوګرافي سروې له بشپړېدو وروسته به د سیمې د اړتیاوو او تخنیکي معیارونو له مخې د ښارګوټي پلان چمتو او د تطبیق لپاره به لازم اقدامات ترسره شي.
دغه اقدام د راستنو شویو هېوادوالو د دایمي مېشتېدنې، د مناسبې سرپناه د برابرولو او د ژوند د بنسټیزو اسانتیاوو د رامنځته کولو په برخه کې مهم ګام بلل کېږي.
