د پوهنې وزارت اړوند نیمه کاره پروژو په اړه خبرې وشوې
۱۴۴۶/۱/۶
د کور او ښار جوړولو وزارت محترم سرپرست وزیر شیخ حمدالله نعماني په خپل کاري دفتر کې د پوهنې وزارت د محترم اداري مرستیال مولوي صبغت الله وصیل او مل پلاوي سره وکتل.
په دغه کتنه کې، د پوهنې وزارت اړوند نیمه کاره پروژو او د ځینو پروژو د ترمیم په تړاو هر اړخیز بحث وشو او نظرونه شریک شول.
د پوهنې وزارت محترم مرستیال په پلازمېنه کابل او ولایتونو کې د دغه وزارت د نیمه کاره پروژو او هغه پروژو په اړه خپلې ستونزې شریکې کړې، چې د نه بشپړتیا او یا قسمې تخریب له کبله یې دوی له ستونزو سره مخامخ دي.
د کور او ښار جوړولو وزارت محترم سرپرست وزیر شیخ حمدالله نعماني راغلي پلاوي ته د پروژو اړوند بشپړ معلومات ورکړل او زیاته یې کړه، که د ښونځيو د پاتې چارو د بشپړولو په موخه ورته بودیجه ورکړل شي، د وزارت انجنیران او تخنیکي ټیمونه یې بشپړ چمتوالی لري چې پاتې چارې ژر بشپړې او ګټې اخیستنې ته وسپاري.
ښاغلي شیخ حمدالله نعماني وویل، د قسمي تخریب شوو تعمیرونو د ترمیم برخه کې خپله د پوهنې وزارت کولای شي لاس په کار شي او دغه راز کولای شي د ښوونځیو په تړاو ځانګړې شوې بودیجه د کور او ښار جوړولو وزارت ته انتقال کړي چې دغه وزارت به د ښوونځیو نیمه کاره چارې سرته ورسوي.
د کور او ښار جوړولو وزارت د کافي بودیجې د شتون په صورت کې چمتو دی چې د ټولو نیمه کاره پروژو چارې سرته ورسوي او ګټې اخیستنې ته یې وسپاري.
