د نیله باغ هستوګنیزې پروژې عملي چارې پیل شوې
۱۴۴۵/۹/۲۹
د ا.ا.ا د لوړو پوړو چارواکو په شتون کې د کابل ښار د دارالامان په سیمه کې د نیله باغ هستوګنیزې پروژې عملي چارې پیل شوې.
د کور او ښار جوړولو وزارت د مسکن، ودانیزو چارو او د زونونو د پراختیا محترم مرستیال مولوي روح الله احمدي د یادې پروژې د عملي چارو د پیل په مراسمو کې د ښه راغلاست وینا ترڅنګ وویل، یاده هستوګنیزه پروژه د چین هېواد په بلاعوضه مالي مرسته د ۷۱ میلیونه ډالرو په ارزښت ترسره کېږي، چې ۱۴۰۰ بابه کورونه په ۵۶ پنځو پوړه بلاکونو کې جوړ شي.
ورپسې، د ا.ا.ا د ریاسة الوزرا محترم عالي مقام اقتصادي مرستیال ښاغلي ملا عبدالغني برادر، په خپلو خبرو کې د نیله باغ هستوګنیزه پروژه د هېواد د ابادۍ او پرمختګ په برخه کې یو ستر بنسټیز ګام یاد کړ.
د غونډې په دوام، د رياسة الوزرا د محترم عالي مقام اداري مرستيال ښاغلي مولوي عبدالسلام حنفي وویل، دغه پروژه په هېواد کې د نورو مهمو پراختیایي پروژو په څېر ده او روان کال به د کورني خصوصي سکتور او د بېلا بېلو هېوادونو د کمپنيو او شرکتونو له لوري د افغانستان په مختلفو برخو کې زياته پانګونه وشي، چې په خبره یې اسلامي امارت پانګوالو ته ټولې لازمې اسانتياوې برابرې کړي دي.
په دغه مراسمو کې، کابل کې د چین هېواد سفیر ښاغلي ژاو شینګ د نیله باغ هستوګنیزې پروژې د عملي چارو د پیل مبارکۍ ترڅنګ وویل، چین او افغانستان په سیمه کې ښه دوست هېوادونه دي، چې په وینا یې چین تل په افغانستان کې د ابادۍ، سولې او پرمختګ ملاتړ کړی.
د نوموړي په وینا، د نیله باغ پروژې د کار پیل د چین هېواد یوه بیلګه ده او چین هڅه کوي، په افغانستان کې په بېلابېلو برخو کې پانګونه وکړي.
په ورته وخت کې، د افغانستان د لوړو زده کړو، محترم وزیر شیخ ندامحمد ندیم وویل، افغانستان کې د ابادۍ او پانګونې لپاره فضاء پوره چمتو شوې ده، کورني او بهرني پانګوال کولای شي چې دلته په ډاډه زړه پانګونه وکړي.
د نیله باغ پروژ د عملي چارو د پیل مراسمو کې، د بهرنیو چارو وزارت مرستیال ښاغلي مولوي رحمت الحق فضیل وویل، وزارت یې بهرنیو پانګوالو سره ناستې کوي په افغانستان کې یې پانګونې ته هڅوي او باور لري چې راتلونکو کالونو کې به د ورته نورو پراختیایي او هستوګنیزو پروژو د پرانستې شاهدانو وي.
همدلته، د پلټنې د عالي اداري محترم مشر مولوي محسن هاشمي وویل، د اسلام مقدس دین د ابادۍ، پرمختګ، امنیت، اقتصاد او له ګاونډیانو سره د ښو اړیکو د درلودلو لارښوونې کوي او په خبره یې، د امارت هر فرد د هېواد ابادۍ ته ژمن دی.
د کور او ښار جوړولو وزارت محترم سرپرست وزیر شیخ حمدالله نعماني د نیله باغ پروژې د عملي چارو د پیل په مراسمو کې وویل، کور د انسان په ژوند کې یوه مهمه او اساسي اړتیا ده، او دوی هڅې پیل کړي چې په افغانستان کې نوې او پخوانۍ نیمه کاره هستوګنیزې پروژې سرته ورسوي تر څو هېوادوال د سرپناه خاوند شي.
ښاغلي شیخ حمدالله نعماني د چین له هېواد، کابل د چین له سفارت، ام، سي، سي ۱۹ کمپنۍ او د چین له پي، پي، آر کمپنۍ مننه وکړه چې په سخت وخت یې افغانستان سره خپلې هر اړخیزې مرستې وکړې او په وینا یې چې د چین هېواد به دا مرسته نه لومړنۍ او نه وروستۍ وي او تمه لري چې د ورته نورو پروژ د پیل شاهدان و اوسي.
نوموړي زیاته کړه، تمه لري چې سږ کال به د کور او ښار جوړولو وزارت دویمه پروژه د هېواد په بل زون کې پیل او د نوي کابل ښار عملي چارې به نورې هم ګړندۍ او په نورو فازونو کې پیل شي.
