د سرپل په سانچارک ولسوالۍ کې د تفریحي پارک د پروژې له چارو څارنه ترسره شوه
۱۴۴۷/۰۹/۲۹
سرپل ولایت کې د کور او ښار جوړولو محترم ریاست اړوند تخنیکي ټیم د سرپُل ولایت د سانچارک ولسوالۍ د ښاروالۍ اړوند د تفریحي پارک د پروژې له روانو چارو څخه څارنه او ارزونه وکړه.
دغه چاره، له ښاري تخلفاتو د مخنیوي او د پروژو پر تطبیق د څار محترم عمومي ریاست په همغږۍ ترسره شوه.
د څارنه په مهال د پروژې بېلابېلې تخنیکي برخې وارزول شوې، چې له مخې یې د حوض د فرش د سیخ تړلو چارې بشپړې شوې وې.
همداراز، د رستورانت، ساتونکو خونې او تشنابونو د دروازو او کړکیو د نصب چارې هم روانې وې.
ټاکل شوي پلاوي، د پروژې د لا ښه تطبیق په موخه هغه نیمګړتیاوې هم په ګوته کړې چې په لومړني براورد کې نه وې شاملې شوې، خو د پروژې د بشپړتیا لپاره یې موجودیت ضروري بلل کېږي.
په همدې موخه قراردادي شرکت ته لازمې سپارښتنې او تخنیکي لارښوونې ورکړل شوې څو د پروژې چارې په غوره کیفیت او معیاري ډول بشپړې شي.
د تفریحي پارکونو جوړول د ښاري خدمتونو د پراختیا، د عامه هوساینې د پیاوړتیا او د ښاریانو لپاره د مناسب تفریحي چاپېریال د برابرولو له مهمو پروژو څخه ګڼل کېږي.
