جلال اباد ښار کې د نږدې څلور سوه میلیونه افغانیو په ارزښت سوداګریز مارکېټ جوړېږي
۱۴۴۵/۰۷/۲۵
د ننګرهار ولایت د کور او ښار جوړولو محترم رئیس مولوي محمد نبي سعیدي وایي، د ننګرهار ولایت په مرکز جلال اباد ښار کې د (۳۶۰) میلیونه افغانیو په ارزښت یو ستر سوداګریز مارکېټ جوړېږي.
د مولوي محمد نبي سعیدي په خبره، یاد مارکېټ په شپږ پوړونو کې د ارزاق دولتي شرکت او د شهزاده ساپي خصوصي شرکت له لوري جوړېږي چې د رغنیزو چارو د کیفیت خوندیتوب او معیار څارنه یې د یاد ولایت د کور او ښار جوړولو ریاست په غاړه ده.
نوموړی وایي، اوسمهال د پلازمېنې او نورو ولایتونو ترڅنګ ننګرهار کې د پانګونې او سوداګرۍ لپاره په لوړه کچه زمینه برابره شوې ده او هر څوک کولای شي د ښارګوټو، مسکن او نورو برخو کې د خپلې خوښې پانګونه وکړي.
د یاد سوداګریز مارکېټ د ننګرهار په څلورمه ناحیه کې جوړېږي چې په جوړولو کې به یې له سیمه ییزو موادو کار واخیستل شي او په اته نیم (۸.۵) جریبه ځمکه کې جوړېږي.
د معلوماتو له مخې، په یاد سوداګریز مارکېټ کې به له (۱۵۰) زیاتې هټۍ جوړې شي چې رغنیزې چارې به یې په (۱۸) میاشتو کې بشړې او ګټې اخیستنې ته وسپارل شي
