د نوي کابل ښار په لومړي فاز کې د معیاري طبي کمپلېکس پر جوړولو هوکړه وشوه
۱۴۴۵/۰۸/۰۹
کابل ښار کې د یو معیاري طبي کمپلېکس جوړولو لپاره ټاکل شوې کمېټې د پرلپسې پنځو ناستو وروسته هوکړه وکړه، چې یاد طبي کمپلېکس دې د نوي کابل ښار پروژې په لومړي فاز کې جوړ شي.
ټاکل شوې یاد طبي کمپلېکس د نوي کابل ښار د لومړي فاز په (۱۰۰) سل جریبه ځمکه کې جوړ او ګټې اخیستنې ته وسپارل شي.
یاده کمېټه د کور او ښار جوړولو وزارت د محترم سرپرست وزیر شیخ حمدالله نعماني له لوري ټاکل شوې، تر څو د عامې روغتیا وزارت اړتیاوو، مشخصاتو او معیارونو ته په کتو کابل ښار کې د یو معیاري طبي کمپلېکس جوړولو لپاره په ځای موافقه وکړي.
په ټوله کې دغه چاره، د ا.ا.ا د محترمې کابینې د روان کال د (۱۰) ګڼې مصوبې د پرېکړې د عملي کولو په موخه ترسره شوه.
د معلوماتو له مخې، جوړېدونکی معیاري طبي کمپلېکس باید په داسې ځای کې جوړ شي چې له ښاري ګڼې ګوڼې لیرې او د خلکو لاسرسی ورته اسان وي.
