ښار جوړولو او ځمکو وزارت سرپرست وزیر د کاپیسا له والي او په ملي شورا کې د خلکو له استازو سره وکتل
ښار جوړولو او ځمکو وزارت سرپرست وزیر محترم محمود کرزی د کاپیسا له والي محترم عبدالطیف مراد، په ملي شورا کې د خلکو له استازو محترم حبیب الرحمان افغان، محترمه ډاکټر جدیجه الهام خلیلي او محترم مولوی محي الدین منصف سره وکتل.
په سر کې، د کاپیسا والي د ساختماني پروژو د تطبیق پر څرنګوالي، د محمود راقي ښارګوټي تفصیلي پلان د بیا کتنې، د کاپیسا ولایت د ښار جوړولو او ځمکو ریاست د تجهیز او د نوي ظرفیتونو پر استخدام خبرې وکړې او د یاد وزارت له مشرتابه څخه په دې اړه د همکارۍ غوښتنه وکړه.
ورپسې، ښارجوړولو او ځمکو وزارت سرپرست وزیر محترم محمود کرزی کاپیسا ولایت یې د یاد وزارت لپاره یو له مهمو ولایتونو یاد کړ او د پروژو د ښه تطبیق او د شته ستونزو د حل لپاره یې د همکارۍ ژمنه وکړه.
همدارنګه، ښار جوړولو او ځمکو وزارت سرپرست وزیر، د محمود راقي ښارګوټي د تفصیلي پلان د بیا کتنې په اړه مسوولینو ته لارښوونه وکړه ترڅو د انجنیري او مهندسي نورمونو او ستنډردنو سره سم په دې پلان کې استوګنیزې، تفریحي، ټولنیزې، تجارتي، اقتصادي او عامه سیمې په پام کې ونیسي او اړین تعدیلات دې په دې پلان کې راوړي.
همداراز، تدارکاتو ریاست او د کاپیسا ولایت د ښار جوړولو او ځمکو ریاست ته لارښوونه وشوه ترڅو د ساختماني پروژو داوطلبي دې په خپل ولایت کې د والي تر نظر لاندې ترسره کړي او د دې پروسې په بشپړېدو سره ساختماني پروژو چارې دې ژر پیل کړي.
په همدې ترتیب، بشري سرچینو ریاست ته لارښوونه وشوه ترڅو د کاپیسا ولایت د ښار جوړولو او ځمکو ریاست د اړتیا سره سم ډېر ژر دې د پنځه انجنیرانو د استخدام زمینه برابره کړي.
د غونډې په پای کې، ښار جوړولو او ځمکو سرپرست وزیر د کاپیسا والي او په ملي شورا کې د خلکو استازو ته په یاد ولایت کې د ځمکوالۍ چارو تنظیم، د ساختماني پروژو د ښه تطبیق او ښاري پراختیا په برخه کې ډاډ ورکړ او د هر راز همکاري ژمنه وکړه.
###
