په پیروزي ښارګوټي کې د ۱۵ بابه نمونهيي استوګنیزونو واحدونو د بنسټ ډبره کېښودل شوه
د ښارجوړولو او ځمکو وزير محترم محمود کرزي نن یکشنبه د ۱۴۰۰ لمريز کال د چنګاښ مېاشتې په ۶ مه نېټه د کابل په ده سبز ولسوالۍ کې په پیروزي ښارګوټي کې د هېواد امنیتي او دفاعي ځواکونو د شهیدانو کورنۍ لپاره د ۱۵ بابه نمونهیي استوګنيزو واحدونو د بنسټ ډبره کېښوده.
په دې مراسمو کې د مسکن معین پوهنمل عزیز احمد ګلستاني، د وزارت مقام سلاکارانو، د پیروزي ښارګوټي پروژې امر ديپلوم انجنير عبیدالرحمن حق یار او يوشمېر نورو چارواکو ګډون کړی و.
دا استوګنيز نمونهيي واحدونه درې، څلور او پنځه اتاقه دي چې په يو او دوه پوړونو کې په پاخه او عصري ډول جوړيږي.
د ويلو ده چې په پیروزي پروژه کې ۲۵۲۷ نمره ځمکې د خلکو او ۱۱۸۶ نمره ځمکې د پوهنې وزارت ښوونکو لپاره ويشل شوې دي او همداراز ښارجوړولو او ځمکو وزارت د جمهوري ریاست عالي مقام د هدایت له مخې د هېواد امنیتي او دفاعي ځواکونو د شهیدانو کورنيو لپاره د څه باندې ۲۵۰۰ د استطاعت وړ استوګنیزو واحدونو د انجنيرۍ کارونه بشپړ کړي دي.
