نورستان کې د دوه ټولګټو پروژو رغنیزې چارې پیل شوې
ښارجوړولو او ځمکو وزارت د ثبات ټینګښت ملي برنامې له لارې د نورستان ولایت په وانټ وایګل ولسوالۍ کې د زنجیل جامع جومات او د ارنس لس صنفي ښوونځي رغنیزې چارې پیل کړې.
زنجیل جامع جومات په ۳۴۷۲ متر مربع ځمکه کې په دوه پوړونو چې په یو وخت کې د ۳۴۰ لمونځ کوونکو ظرفیت لري د ۱۶ میلیونه افغانیو په ارزښت د ښارجوړولو او ځمکو وزارت د پراختیايي بودیجې او د ارنس لس صنفي ښوونځی په ۷۹۸ متر مربع ځمکه کې په دوه پوړونو د ۲۷ میلیونه افغانیو په ارزښت د معارف وزارت له بودیجې جوړیږي.
ښارجوړولو او ځمکو وزارت د مقدسه اماکنو او جوماتونو په جوړولو او مرمت سره د اسلامي ارزښتونو په ساتنه کې مهم رول لوبولی او ښوونځیو ته د معیاري ودانیو په جوړولو ښوونکو او زده کوونکو ته د زده کړې او تدریس مناسبه فضا مساعده او د تعلیمي برنامو په تطبیق کې پوهنې وزارت سره مرسته کوی.
###
