په نوي کابل ښار کې د ۲.۱ برخې تفصیلي پلان منظور شو
۱۴۴۸/۴/۳
د کور او ښار جوړولو وزارت د محترم وزیر الحاج مولوي نجیبالله حیات حقاني له لوري، د نوي کابل ښار د لومړي فاز د ۲.۱ برخې تفصیلي پلان منظور شو.
د دغه پلان د منظورۍ چارې د محترم وزیر الحاج مولوي نجیبالله حیات حقاني د هڅو او د نوي کابل ښار د منظمې، معیاري او متوازنې پراختیا لپاره د نوموړي د ځانګړې پاملرنې په لړ کې ترسره شوې دي.
د نوي کابل ښار د لومړي فاز د ۲.۱ برخې تفصیلي پلان د شاوخوا ۷۲۰۰ جریبه ځمکې لپاره د عمرزي پراختیا ورکوونکي شرکت له لوري د نوي کابل ښار د لومړي فاز له جوړښتي پلان سره سم ترتیب شوی دی.
دغه برخه د نوي کابل ښار د لومړي فاز له مهمو پراختیايي برخو څخه دی، چې په تفصیلي پلان کې یې د استوګنې، سوداګرۍ، صنعت، شنو او تفریحي ساحو ترڅنګ بېلابېلې ټولنیزې او خدماتي اسانتیاوې په پام کې نیول شوې دي.
د پلان له مخې، په ۲.۱ برخه کې به له ۱۰ زرو څخه زیات استوګنیز پلاټونه، نږدې ۹۰۰ استوګنیزې او سوداګریزې لوړپوړې ودانۍ او له ۲۰۰ څخه زیاتې صنعتي کارخونې جوړې شي.
همداراز، په دغه پلان کې تر ۶۰ پورې جوماتونه، ۲۵ ښوونځي، له ۳۰ څخه زیات روغتیايي مرکزونه، تعلیمي، فرهنګي، ورزشي او تفریحي ساحې، د کرکټ لوبغالی، شنې ساحې، پارکونه او نورې اړینې ښاري اسانتیاوې په پام کې نیول شوې دي.
د کور او ښار جوړولو وزارت د محترم وزیر الحاج مولوي نجیبالله حیات حقاني په مشرۍ، د نوي کابل ښار د پراختیا په بهیر کې د معیاري ښاري پلان جوړونې، منظمې ځمکوالۍ او د ښاري اړتیاوو د تأمین لپاره هڅې روانې دي، څو دغه ستره پروژه د پلازمېنې د راتلونکې منظمې پراختیا لپاره په معیاري او متوازن ډول عملي شي.
