د کاپیسا ولایت د مقام نوي ودانیز تعمیر چارې له درې کلن ځنډ وروسته، بیا پیل شوې
۱۴۴/۱۱/۲۱
د اسلامي امارت د زعیم عالیقدر امیرالمؤمنین حفظه الله په ځانګړې پاملرنه او د کاپیسا ولایت د مقام د هڅو په پایله کې، د دې ولایت د مقام د نوې درې پوړېزې ودانۍ د جوړولو چارې، له درې کلن ځنډ وروسته، رسماً بیا پیل شوې.
کاپیسا ولایت کې د کور او ښار جوړولو ریاست محترم رئیس مولوي مرتضی صافی وایې، د یادې پروژې چارې چې د تېرې شل کلنې دورې په مهال پیل او په هماغه مهال بېرته ځنډېدلې وې، چې اوس یې بیا چارې د عالیقدر امیرالمؤمنین حفظهالله د حکم له مخې، بیا پیل شوې.
ښاغلی مولوي مرتضی صافی د پروژې د تخنیکي مسؤولینو له قوله وایي، دا درې پوړیزه ودانۍ به درې لوی تالارونه، ۳۰ معیاري اداري خونې او ټول اړوند ملحقات ولري.
د معلوماتو له مخې، د ودانۍ ټولیز لګښت ۳۵ میلیونه، ۵۰۶ زره او ۳۰۰ افغانۍ دی، چې د اسلامي امارت له بودیجې تمویلېږي.
نوموړی وایې، د دې ودانۍ له بشپړېدو سره به د ولایت مقام لپاره یو معیاري، مجهز او با وقاره اداري مرکز برابر شي، چې هم به د ادارو چارې چټکې شي او هم به د خلکو خدمترسونې ته نوی روح ورکړي.
