د کابل ولایت د قرهباغ ولسوالۍ د پراختیايي پلان له ساحو څخه د ښاري سرغړونو د مخنیوي په موخه نظارت ترسره شو
۱۴۴۷/۱۱/۱۵
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست تخنیکي ټیمونو، د منظم او دوامداره نظارتي پروګرامونو په لړ کې د کابل ولایت د قره باغ ولسوالۍ د پراختیايي پلان له ساحو څخه ساحوي نظارت ترسره کړ.
د نظارت په پیل کې، یاد تخنیکي ټیم د همغږۍ په موخه د قره باغ ولسوالۍ له محترم ولسوال او د امنیه قومندانۍ له مسؤلینو سره لیدنه وکړه، څو د نظارتي بهیر د اغېزمنتیا لپاره لازمې همغږۍ تأمین شي.
وروسته، تخنیکي ټیم د ولسوالۍ د پراختیايي پلان اړوند ساحې وڅېړلې او هغه سرغړونې یې له نږدې و ارزولې چې مخکې په دې ساحه کې تثبیت شوې وې.
همداراز، د یادو سرغړونو د تعقیب او رسېدنې په موخه د قره باغ ولسوالۍ له ښاروالۍ سره هم همغږي ترسره شوه او د هغو قضیو د رسېدنې بهیر وارزول شو چې وړاندې د رسمي مکتوبونو له لارې شریکې شوې وې.
د یادو نظارتونو اساسي موخه د ښاري پلانونو سم تطبیق، د غیرقانوني ودانیزو فعالیتونو مخنیوی او د ښاري مدیریت د بهیر پیاوړتیا بلل کېږي.
دا لړۍ به د کاري پلان له مخې په دوامداره توګه روانه وي او نورې ساحې به هم تر پوښښ لاندې ونیول شي.
