د ښار جوړولو او ځمکو وزارت سرپرست د غور له والي سره وکتل
۱۴۴۳/۰۹/۰۹
د ښار جوړولو او ځمکو وزارت سرپرست محترم مولوي حمد الله نعماني په خپل کاري دفتر کې د غور ولایت له والي مولوي دین دوست سره وکتل او د غور ولایت اړوندو موضوعاتو او د ستونزو د حل برخه کې یې خبرې وکړې.
د غور والي مولوي دین دوست د خپل ولایت په اړه د ښار جوړولو او ځمکو وزارت سرپرست ښاغلي مولوي حمد الله نعماني ته بشپړ معلومات ورکړل او هغه ستونزې او ننګونې یې په ګوته کړې چې په یاد ولایت کې د پرمختګ او پراختیا پر وړاندې خنډ رامنځته کوي.
دین دوست زیاته کړه چې غور په لرې سیمه کې پروت ولایت او په تېر کې له پامه غورځول شوی چې په وینا یې د ا.ا.ا یې باید ستونزې حل کړي.
مولوي دین دوست وویل، غور ولایت په اوس وخت کې د ښار جوړولو او ځمکو وزارت پاملرنې ته جدي اړتیا لري او له ښاغلي مولوي حمد الله نعماني یې وغوښتل چې د ستونزو د حل برخه کې ورسره همکاري وکړي.
د ښار جوړولو او ځمکو وزارت سرپرست محترم مولوي حمد الله نعماني وویل، د وزارت امکاناتو ته په کتو به د هېواد په کچه د ښارونو ستونزو او ننګونو ته حل لاره پیدا کړي او د اوس لپاره یې د غور والي ته د ځینو ستونزو د حل برخه کې لازمې لارښوونې وکړې او ډاډ یې ورکړ چې د خپل وزارت اړوندو برخو کې به اقدام وکړي.
