د درې اړخیزه هوکړه لیک په تطبیق سره به په هېواد کې د ټاپي پروژې د پلي کېدو چارې ژر پیل شي
دا خبره محمود کرزی د ښار جوړولو او ځمکو وزارت سرپرست وزیر او هارون چخانسوری د کانونو او پټرولیم سرپرست وزیر په هغه خبري ناسته کې چې د ښار جوړولو او ځمکو وزارت، د کانونو او پټرولیم وزارت او د ټاپي پروژې د تطبیق کوونکي شرکت ترمنځ د درې اړخیزه هوکړه لیک د لاسلیک کولو په مناسبت جوړه شوې وه وویل.
دا هوکړه لیک د ټاپي پروژې د استملاک قانون په رڼا کې د اړونده ادارو ترمنځ د همغږۍ د کچې د لوړولو، د استملاک چارو د ګړندي کولو او د ټاپي پروژې د عملي چارو د ژر پیل لپاره جوړ شوی دی.
په دې کنفرانس کې ښار جوړولو او ځمکو وزارت او د کانونو او پټرولیم وزارت سرپرست وزیرانو وویل: "د ټاپي پروژې د تطبیق پر وړاندې حقوقي او تخنیکي ستونزې حل شوي او د دې هوکړه لیک په پلي کېدو سره به د پروژې عملي چارې ژر پیل شي."
د دې هوکړه لیک پر اساس به یو ځانګړی واحد جوړ شي چې په دې سره د ټاپي پروژې د مالکیت حق د تثبیت او د ځمکو د استملاک چارې ګړندی او د یادې پروژې عملي کارونه به ژر پیل شي. سربېره پردې، د دې هوکړه لیک په رڼا کې په پام کې ده چې د ټاپي پروژې د چارو د ښه تنظیم او مدیریت، کاري ټیمونو ته د لازمو اسانتیاوو د برابرولو او په سیمه کې د ستونزو د حل لپاره د رهبرۍ کمیټه هم رامنځته شي.
د ټاپي پروژې په بشپړ تطبیق سره به، افغانستان هر کال د ګازو د ترلاسه کولو سربېره، پاکستان او هندوستان ته د ګازو د ټرانزیت له لارې څه باندې ۴۰۰ میلیونه ډالر ترلاسه کړي. همداراز، د دې پروژې په تطبیق سره د اقتصادي فرصتونو ترڅنګ، د هرات، فراه، نیمروز، هلمند او کندهار ولایتونو زرګونه هېوادوالو ته به کاري فرصتونه پیدا شي.
د ټاپي پروژې مجموعي اوږدوالی ۱۸۱۴ کیلومتره ده چې دا نل لیکه، د ترکمنستان ګاز د افغانستان له لارې پاکستان او هندوستان ته انتقالوي. د دې مجموعي رقم څخه ۸۱۴ کیلومتره د افغانستان په خاوره کې د هرات، فراه، نیمروز، هلمند او کندهار ولایتونو څخه تیریږي.
