د غزني ولایت په پخواني ښار کې د غیر قانوني ښاري فعالیت مخنیوی وشو
۱۴۴۷/۱۰/۲۴
د کور او ښار جوړولو وزارت، له ښاري سرغړونو د مخنیوي او د پروژو پر تطبیق د څار محترم عمومي ریاست په هدایت غزني ولایت کې د ښاري تخلفاتو مخنیوی وشو.
د غزني ولایت د کور او ښار جوړولو ریاست اړوند د پخوانیو ښارونو د ساتنې عمومي مدیریت تخنیکي ټیم د یاد ولایت په تاریخي ښار کې څارنه وکړه.
د څارنې په مهال معلومه شوه، چې په دغه ښار کې غیرقانوني فعالیت ترسره کېږي او سمدستي یې مخنیوی وشو.
دغه تخلف د غزني د پخواني ښار په لوېدیځه څنډه کې رامنځته شوی و، چې ځینو ځایي اوسېدونکو غوښتل د شاوخوا ۱۵ متره په اوږدوالي یو دېوال جوړ کړي او هڅه یې کوله چې په دننه کې یې په خپل سر نور ودانیز کارونه هم پر مخ یوسي.
یاد فعالیت د پخوانیو ښارونو د ساتنې له نافذه قانون سره په ټکر کې و او له همدې امله د تخنیکي ټیم له لوري سمدستي د کار د درولو او د وضعیت د بېرته اصلاح جدي هدایت ورکړل شو.
د کور او ښار جوړولو ریاست مسؤلینو ټینګار وکړ، چې ټول ودانیز فعالیتونه باید د قدیمي ښارونو د ساتنې د قانون له اصولو سره سم او د اړوندو ادارو سره په بشپړه همغږۍ ترسره شي، څو د تاریخي ابدو او فرهنګي میراثونو ساتنه وشي.
