ښار جوړولو او ځمکو وزارت سرپرست وزیر د ټاپي پروژې تطبیق کوونکي شرکت له اجراییه رئیس سره وکتل

ښار جوړولو او ځمکو وزارت سرپرست وزیر محترم محمود کرزی د ټاپي پروژې تطبیق کوونکي شرکت (TPCL) له اجراییه رئیس ښاغلی محمد مایرت امانوف، په کابل کې د ترکمنستان سفیر ښاغلی خواجه ایوزوف او ورسره راغلی پلاوي سره وکتل او د ټاپی پروژې د تطبیق پر څرنګوالي خبرې وکړې.

په دې کتنه کې، لومړۍ د (TPCL) شرکت اجراییه رئیس د وروستیو پرمختګونو څخه خوښي وښوده او زیاته یې کړه چې د ټاپي پروژې چارې په ترکمنستان کې د افغانستان تر سرحده پای ته رسېدلي او زیاته یې کړه چې د پروژې اړوند استملاک او ساختماني چارې دې باید ژر تر ژره په هرات ولایت کې پیل او په تدریجي توګه نورو ولایتونو ته وغځیږي. نوموړي همدارنګه د همکارۍ هوکړه لیک پر لاسلیک او د پروژې چارو د ښه مدیریت لپاره د رهبرۍ کمیټې پر جوړېدو ټنیګار وکړ.

ورپسې، ښار جوړولو او ځمکو وزارت سرپرست وزیر محترم محمود کرزی افغانستان دولت ته د دې پروژې اقتصادي اهمیت په اړه خبرې وکړې او اړوندو مسوولینو ته لارښوونه وکړه ترڅو د دوو اونیو په لړ کې د هوکړه لیک د لاسلیکولو زمینه برابره کړي. همدارنګه مسوولینو ته لارښوونه وشوه ترڅو د کانونو او پټرولیم وزارت سره په ګډه د رهبرۍ کمیټې د غړو لست چمتو او ژر تر ژره دې (TPCL) شرکت چارواکو ته واستوي. همدارنګه ټینګار وشو ترڅو د چارو د ښه تنظیم لپاره د دواړو لورو څخه یو کس د رابط په توګه تعیین او مشخص شي.

ښار جوړولو او ځمکو وزارت سرپرست وزیر ترکمنستان هېواد یې په اقتصادي برخه کې د افغانستان دولت یو ښه همکار وباله، زیاته یې کړه چې د ټاپي پروژې تطبیق د دواړو هېوادونو ګډ کار دې او د دې پروژې د چارو د ښه تنظیم او چټکتیا لپاره مسوولینو ته لازمې لارښوونې وکړې.

##