ښار جوړولو او ځمکو وزارت سرپرست وزیر د کانونو او پټرولیم له سرپرست وزیر سره وکتل
ښار جوړولو او ځمکو وزارت سرپرست وزیر محترم محمود کرزی د کانونو د پټرولیم له سرپرست وزیر محترم هارون چخانسوري سره وکتل او د ټاپي پروژو د تطبیق پر څرنګوالي خبرې وکړې.
په سر کې، د کانونو د پټرولیم وزارت مسوولینو د ټاپي پروژې د وروستیو پرمختګونو په اړه معلومات ورکړل او زیاته یې کړه چې د ښار جوړولو او ځمکو وزارت او اړونده ادارو په همکارۍ په وروستیو کې د ټاپي پروژې قانون ترتیب او په کابینه کې د جلالتماب جمهور رئیس له خوا منظور شو. دوی همداراز د ټاپي پروژې د مدیریت لپاره د یوې مشخصې څانګې د جوړونې لپاره د ښارجوړولو او ځمکو وزارت څخه د همکارۍ غوښتنه وکړه.
ورپسې، د ښار جوړولو او ځمکو وزارت د ځمکوالۍ چارو مرستیال او مسوولینو د ټاپي پروژې د قانون منظوري یې د یادې پروژې د حقوقي ستونزو حل لپاره یو ښه اقدام وباله او د استملاک او اسکان مجدد د نوې ادارې د جوړېدو لپاره د جمهور رئیس د وروستي اقدام څخه په مننې؛ په هرات کې د ټاپي پروژې په تړاو د 12.6 کیلومتره د تصفیې او د مالکیت حق د تثبیت په اړه معلومات وړاندې کړل.
د غونډې په جریان کې، د ښار جوړولو او ځمکو وزارت سرپرست وزیر محترم محمود کرزی د ټاپي پروژې تطبیق يې د حکومت یو له مهمو لومړیتوبونو څخه وباله او د دې مهمې پروژې د تطبیق لپاره یې د هر راز همکارۍ ژمنه وکړه.
همدارنګه، محترم محمود کرزی، د کانونو او پټرولیم سرپرست وزیر د غوښتنې سره سم، لارښوونه وکړه ترڅو د دواړو وزارتونو څخه یو مشترک کاري کمیټه رامنځته شي ترڅو دا کمیټه د تفاهم لیکونو د متن د وروستي کولو، د ټاپي پروژې د مدیریت لپاره د یوې مشخصي څانګې د رامنځته کولو، په پروژه کې د شته ستونزو د تثبیت، او په لوژستيکي، مالي او امنیتي برخو کې د یوې دقیقې ارزونې د ترسره کولو لپاره کار وکړي ترڅو د دې کمیټې د موندنو پر اساس د مالي سرچينو د پیدا کولو او د پروژې د عملي چارو د پیل لپاره اړین اقدامات ترسره شي.
همداراز، د ښار جوړولو او ځمکو وزارت سرپرست وزیر، له دواړو لورو وغوښتل ترڅو د پروژې په تړاو مشخصې ستونزې دې د ټاپي پروژې د تطبیق کوونکي شرکت (TPCL) سره شریک کړي ترڅو شته ستونزې حل او د دې مهمې پروژې د تطبیق چارې ژر تر ژره پیل شي.
##
