ښار جوړولو او ځمکو سرپرست وزیر له پیروزي استوګنیز ښارګوټي لېدنه وکړه
ښار جوړولو او ځمکو سرپرست وزیر محترم محمود کرزي د ښار جوړولو، ځمکوالۍ چارو تنظیم او کور جوړونې معین په ملتیا د کابل دهسبز ولسوالي کې پروت د پیروزي په نوم له استوګنیز ښارګوټي څخه لیدنه وکړه.
په پیل کې د پیروزي ښارګوټي امر محترم عبیدالرحمان عبیدي د ښارګوټي ټولو برخو په اړه معلومات وړاندې کړل. د عبید په وینا پیروزي ښارګوټی د ۸ زره جریبه ځمکې په مساحت، ۸۸۰۰ استوګنیزو نومرو او ۴۱۷ بلاکونو په لرلو سره په شپږو فازونو وېشل شوی دی.
ورپسې د ښار جوړولو او ځمکو سرپرست وزیر په څو فازونو کې د جوړو شویو سرکونو او د زېربنا نورو برخو څخه له نږدې وکتل او لارښوونه یې وکړه چې د زېربنا په ساتلو کې دې جدي هڅې وشي.
محترم محمود کرزي دغه راز د هر متر مربع په مقابل کې د اوسنۍ بیې په اړه وویل چې دغه بیې دې د خلکو اقتصادي وضعیت ته په کتو راټېټې شي.
د ښار جوړولو او ځمکو سرپرست وزیر دغه راز وویل، پیروزي ښارګوټی له هر اړخه ښه موقعیت لري او ژمنه یې وکړه چې دا ښارګوټی به په عصري او معیاري توګه ورغول شي.
محترم محمود کرزي په پای کې اړوندو برخو ته سپارښتنه وکړه چې د ښارګوټي ټولې چارې دې په معیاري ډول ترسره کړي.
د ویلو ده چې د دغه ښارګوټي په صنعتي برخه کې اوس مهال ۱۳ فابریکې فعالې دي او تر ۷۰ نورې هغه د ماشینري نصب په حال کې دي.
د پیروزی ښارګوټي یوازینۍ موخه کور ته د شته اړتیا ځواب او پر اړمنو د استوګنیزو نومرو وېش دی. په وروستیو کې په دغه ښارګوټي کې دننه ۱۱۷۷ استوکنیزې نومرې د امنیتي او دفاعي ځواکونو شهیدو منسوبینو کورنیو باندې ووېشل شوې.
