په پکتیا ولایت کې د رباط کډوالو ښارګوټي کې د استوګنیزو نمرو د خط اچونې چارې پیل شوې
۱۴۴۷/۰۹/۲۸
راستنېدونکو مهاجرو کورنیو ته د استوګنې لپاره د ځمکو د وېش لړۍ په بېلابېلو ولایتونو کې روانه ده، چې په همدې لړ کې د پکتیا ولایت د رباط کډوالو ښارګوټي کې د استوګنیزو نمرو د خط اچونې چارې پیل شوې.
د کور او ښار جوړولو وزارت د محترم وزیر الحاج مولوي نجیب الله حیات حقاني د لارښوونې پر اساس، د پکتیا ولایت د کور او ښار جوړولو تخنیکي او مسلکي ټیم له لوري، د منظور شوي پلان او تفویض شویو صلاحیتونو په چوکاټ کې د یاد ښارګوټي د نمرو د خط اچونې عملي چارې پيل شوې.
په یاد ښارګوټي کې د نمرو د وېش د بهیر د چټکتیا لپاره لازم تخنیکي اقدامات ترسره شوي او ټاکل شوې ده چې په نږدې راتلونکې کې به دا نمرې راستنېدونکو مهاجرو ته د وېش لپاره چمتو شي، څو هغوی د دایمي مېشتېدو زمینه ترلاسه کړي.
د پکتیا ولایت د رباط ښارګوټی شاوخوا په دوه زره جریبه ځمکه کې طرحه او منظور شوی، چې پکې د استوګنې ترڅنګ د بنسټیزو اسانتیاوو برابرولو ته هم پاملرنه شوې ده. د دې ښارګوټي جوړول به راستنېدونکو کورنیو ته د سرپناه برابرولو ترڅنګ، د هغوی د ژوند د ثبات او ټولنیز ادغام په برخه کې مهم ګام وي.
