محترم محمود کرزی: ټول کارکوونکي دې برېښنايي پېژندپاڼه واخلي
ښار جوړولو او ځمکو وزارت سرپرست وزیر محترم محمود کرزی په دې وزارت کې د احصایې او معلوماتو ملي ادارې د سیار ټیم چارې له نږدې وکتلې او لارښوونه یې وکړه چې د یاد وزارت ټول کارکوونکي دي باید د برېښنايي پېژندپاڼو د اخېستلو لپاره نوم لیکنه وکړي او په دې ملي پروسه کې برخه واخلي.
ښار جوړولو او ځمکو وزارت سرپرست وزیر د برېښنايي پېژندپاڼې په اخیستلو د ټینګار تر څنګ، په اوسنیو شرایطو کې د چارو د لا ښه سمبالښت او په ملي پروسو کې د روڼتیا په موخه د برېښنايي پېژندپاڼو اخیستل خورا اړین وبلل.
محترم محمود کرزی د احصایې او معلوماتو ملي ادارې د سیار ټیم له نه ستړې کېدوونکو هلو ځلو مننه وکړه او د یاد ټیم څخه یې وغوښتل ترڅو دغه پروسه ژر تر ژره په دې وزارت کې پای ته ورسوي.
د یادولو ده چې په دې کتنه کې ښاغلی محمد غوث غوثي د وزارت د دفتر رئیس او د بېلابېلو برخو مسوولینو له ښار جوړولو او ځمکو وزارت سرپرست وزیر سره ملتیا کوله.
