محترم محمود کرزی: د نوي کابل ښار جوړونه د وزارت مهم لومړیتوب دی
ښار جوړولو او ځمکو وزارت سرپرست وزیر محترم محمود کرزی نن وروسته له غرمې له یو شمېر مرستیالانو، رئیسانو، انجنیرانو او د ځمکې د تصفیې له کارکوونکو سره وکتل.
په دې کتنه کې، ښار جوړولو او ځمکو وزارت سرپرست وزیر، د نوي کابل ښار په تړاو د ځمکې د تصفیې او د مالکیت حق د تثبیت چارې تر ارزونې لاندې ونیولې.
ورپسې، د ځمکو د تصفیې کارکوونکو خپل کاري ریپوټ وړاندې کړ او د کابل ولایت په ده سبز سیمه کې د ۲۰ زره جریبه ځمکې د تصفیې خبر ورکړ.
محترم محمود کرزی، د نیوي کابل ښار جوړونه د ښار جوړولو او ځمکو وزارت یو له مهمو لومړیتوبونو یاد کړ او اړونده څانګې ته لارښوونه وکړه ترڅو پر تصفیه شوي ځمکې د توپوګرافي چارې ژر پیل کړي.
ښار جوړولو او ځمکو وزارت سرپرست وزیر په نوي کابل ښار کې د لوړو انجنیري او مهندسي معیارونو په پام کې نیولو سربېره ټینګار وکړ چې د نوي کابل ښار په جوړونه کې به له نوي او قدیمي معماري سبکونو څخه استفاده وشي.
###
