د کور او ښار جوړولو وزیر د پروان له والي سره د ښاري پراختیا په تړاو وکتل
۱۴۴۷/۵/۲۸
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې د پروان ولایت له والي، مفتي محمد ادریس انوري سره وکتل.
دواړو لوریو په دغه کتنه کې، د پروان ولایت د ښاري پراختیا اړوند مهمو موضوعاتو باندې هر اړخیزې خبرې وکړې، ترڅو وکولای شي خلکو ته اسانتیاوې برابرې کړي.
په لیدنه کې د پروان محترم والي د پروان شته ښاري وضعیت په تړاو معلومات وړاندې کړل او زیاته یې کړه چې د پروان ښار د هر اړخیزې ګڼې ګوڼې او د نفوس د چټک زیاتوالي له امله د پلان بیاکتنې ته جدي اړتیا لري.
نوموړي زیاته کړه، اړتیا ویني چې ځینې استوګنیزې ساحې په سوداګریزو تبدیل شي، د مهاجرینو د ښارګوټي لپاره پلان چارې چټکې شي، او د پروان ښار د شته پلان بیا کتنه وشي، ترڅو په ښار کې د پرمختیايي پروژو د لا ښه همغږۍ او اغېزمن مدیریت لپاره زمینه برابره شي.
د کور او ښار جوړولو محترم وزیر الحاج مولوي نجیب الله حیات حقاني، ډاډ ورکړ چې د پروان ولایت د ښار پلان د بیا کتنې موضوع به له اړوندو ریاستونو، مسلکي ټیمونو او تخنیکي کارپوهانو سره شریکه کړي، او که اړتیا وه، د پلان د اصلاح او عملي کولو لپاره به لازم ګامونه پورته کړي.
ښاغلي وزیر وویل، تفصیلي پلان دې د پروان ولایت د ښاروالي محترم ریاست او په پروان ولایت کې شته د کور او ښار جوړولو ریاست په همغږۍ او همکارۍ جوړ او د ویزې لپاره وزارت ته را واستوي، چې تر ارزونې وروسته به ویزه او د تطبیق لپاره وسپارل شي.
ناسته د ښاري خدمتونو د معیاري کولو، د ښار د تنظیم، او د خلکو د هوساینې لپاره د ګډو همکاریو پر ټینګار سره پای ته ورسېده.
