د کابل–بګرام سړک پروژې د چارو د چټکتیا په موخه ساحوي ناسته وشوه
۱۴۴۸/۳/۶
د کابل–بګرام سړک پروژې د چارو د چټکتیا او د پاتې خنډونو د هواري په موخه، د پروژې په ساحه کې د برېښنا شرکت له تخنیکي ټیم سره ګډه ساحوي ناسته ترسره شوه.
په دې ناسته کې د پروژې د روانو چارو، په ځانګړي ډول د برېښنا اړوندو فعالیتونو او د کار د چټکتیا پر څرنګوالي خبرې وشوې. د برېښنا شرکت تخنیکي ټیم ژمنه وکړه چې د خپلو اړوندو چارو د چټک بشپړولو او د پروژې د کاري بهیر د لا چټکتیا لپاره به لازم اقدامات ترسره کړي.
د پروژې په ساحه کې د سړک د ختیځې برخې په بېلابېلو سیمو کې د ځمکې د کیندنې چارې روانې وې او په یو شمېر برخو کې د سړک د بنسټیزې طبقې د موادو د هوارولو او کلکولو چارې ترسره کېدې. همدارنګه د فرعي بنسټ د طبقې د هوارولو او کلکولو فعالیتونه هم روان وو.
د سړک په ختیځه برخه کې د استنادي دېوال د ډبرو کارۍ چارې بشپړې شوې دي. ورسره هممهاله د اتم او نهم پلچک د چت او بیمونو د قالب تړلو او سیخ تړلو چارې هم روانې وې.
د پروژې د تګ راتګ د اسانتیا او د ساختماني فعالیتونو د منظم دوام په موخه، د اړوند کمېسیون په همغږۍ د موقتي سړک د هوارولو او کلکولو چارې هم ترسره شوې.
د برېښنا شرکت له لوري د برېښنا د ستنو د نصبولو چارې د قراردادي شرکت په تخنیکي همکارۍ روانې وې، چې د دې فعالیتونو په بشپړېدو سره به د سړک د پروژې په اړوندو برخو کې د ساختماني چارو د لا ښه پرمختګ زمینه برابره شي.
له بلې خوا، د سړک په ختیځه او لویدیځه برخه کې د یو شمېر دوکانونو او مارکېټونو د تخریب چارې هم د اړوندو مالکانو له لوري ترسره شوې، چې په دې سره د پروژې د تطبیق لپاره د ساحې د چمتو کولو بهیر مخته ځي.
د کابل–بګرام سړک د پروژې د چارو د چټک پرمختګ په موخه د اړوندو ادارو ترمنځ همغږي دوام لري او هڅه کېږي چې پاتې خنډونه پر وخت هوار او ساختماني چارې د ټاکل شوي کاري پلان مطابق په چټکۍ او معیاري ډول پرمخ یووړل شي.
