د ښاریانو د ستونزو حل د ښار جوړولو او ځمکو وزارت له موخو څخه دی
۲۶/۰۲/۱۴۴۴
د ښار جوړولو او ځمکو وزارت سرپرست محترم مولوي حمدالله نعماني د خپلو ورځنیو غونډو په دوام د هېواد د بېلابېلو ولایتونو له یو شمېر ښاریانو سره د هغوی د ستونزو د حل په موخه وکتل.
دغو ښاریانو د خپلو سیمو د ښاري وضعیت په اړه خبرې وکړې او خپلې ستونزې اوغوښتنې یې د ښار جوړولو او ځمکو وزارت له سرپرست محترم مولوي حمدالله نعماني سره شریکې کړې او په دې برخه کې یې د همکارۍ غوښتنه وکړه.
د ښار جوړولو او ځمکو وزارت سرپرست مولوي حمدالله نعماني وویل: د ښاریانو د ستونزو حل د دغه وزارت له اساسي موخو څخه دی. نوموړي اړوندو ادارو ته امر وکړ، چې د دغو ښاريانو غوښتنې په وخت سره حل کړي.
