د کور او ښار جوړولو وزارت، د ساختماني موادو د کیفیت ازموینې لپاره لابراتوار جوړوي
۱۴۴۷/۱۱/۱۲
د کور او ښار جوړولو وزارت محترم وزیر الحاج مولوي نجیب الله حیات حقاني، د ساختماني موادو د کیفیت ازموینې د لابراتوار لپاره د ودانۍ د بنسټ ډبره کېښوده.
په دغو مراسمو کې، د کور او ښار جوړولو وزارت محترم وزیر الحاج مولوي نجیب الله حیات حقاني، د سترې محکمې محترم معین شیخ نورالله منیر، په نوي کابل ښار کې د پراختیا ورکوونکو شرکتونو رئیسانو، د کور او ښار جوړولو وزارت ځینو رئیسانو او انجنیرانو ګډون کړی وو.
غونډې ته په وینا کې، د سترې محکمې محترم معین شیخ نورالله منیر، د اسلامي امارت راتګ، حاکمیت او بقا، د هېواد د بیا رغونې، ابادۍ او پرمختګ لپاره یو مهم فرصت وباله او ټینګار یې وکړ چې چارې باید په پوره صداقت، امانتدارۍ او مسلکي ژمنتیا سره ترسره شي.
همدلته، د کور او ښار جوړولو وزارت محترم وزیر الحاج مولوي نجیب الله حیات حقاني وویل، د دې لابراتوار په جوړېدو سره به د ودانیزو موادو کیفیت په معیاري او مسلکي ډول ارزول کېږي، څو راتلونکې ساختماني چارې په لوړ کیفیت او د انجنیري اصولو سره سمې عملي شي.
ښاغلي وزیر الحاج مولوي نجیب الله حیات حقاني، له قراردادي شرکتونو وغوښتل چې خپلې چارې د ملي او نړیوالو معیارونو او تخنیکي اصولو مطابق پر مخ یوسي.
د ساختماني موادو د کیفیت خوندیتوب د هرې ودانۍ د پایښت، خوندیتوب او اقتصادي ارزښت لپاره بنسټیز اهمیت لري او د کیفیت کنټرول یو مهم اصل دی چې باید د هرې ساختماني پروژې په ټولو پړاوونو کې په پام کې ونیول شي.
په لابراتوار کې به د موادو فزیکي او کیمیاوي ځانګړتیاوې اندازه کېږي، تر څو ډاډ ترلاسه شي چې مواد له ملي او نړیوالو معیارونو سره سمون لري.
د یاد لابراتوار د بنسټ ډبره اېښودل په داسې حال کې ترسره کېږي چې په نوي کابل ښار او نورو ښاري سیمو کې د ساختماني پروژو بهیر مخ په پراخېدو دی.
