د ښار جوړولو او ځمکو وزارت مرستیال له امان الله غالب سره وکتل
443/11/09
د ښار جوړولو او ځمکو وزارت محترم مالي او اداري مرستیال حافظ محمد امین فاروقي د تېر حکومت په مهال د برېښنا شرکت له اجرائیوي مشر ښاغلي امان الله غالب سره وکتل او هېواد ته ښه راغلاست یې ورته وویل.
په دغه لیدنه کې د ښار جوړولو او ځمکو وزارت محترم مالي او اداري مرستیال حافظ محمد امین فاروقي هېواد ته د یو شمېر مخکینیو افغان سیاسیونو راتګ یو نیک اقدام وباله او زیاته یې کړه چې افغانستان د ټولو افغانانو ګډ کور دی.
هغه وویل، اسلامي امارت له ټولو تللو هېوادوالو غواړي چې بیرته راشي او په خپل هېواد کې خدمت وکړي.
حافظ محمد امین فاروقي د خپلو خبرو پر دوام وویل، اسلامي امارت به وړتیا او ظرفیتونو ته په کتو په بېلا بېلو برخو کې له راغلو شخصیتونو ګټه پورته کړي او د خدمت کولو زمینه به ورته برابره کړي.
ورپسې د برېښنا شرکت پخواني اجرائیوي مشر انجنیر امان الله غالب، د اسلامي امارت له مشرانو او په ځانګړې توګه د ښار جوړولو او ځمکو وزارت له مالي او اداري مرستیال حافظ محمد امین فاروقي څخه مننه وکړه چې د بیرته راتګ په برخه کې یې ورسره همکاري وکړه.
انجنیر امان الله غالب وویل، چمتو دی چې د اسلامي امارت په اډانه کې خپل هېواد او خلکو ته خدمت وکړي او د یو افغان په توګه خپله ایماني او وجداني دنده سرته ورسوي.
