د ښارجوړولو او ځمکو وزارت سرپرست وزیر د انګلستان سفیر مرستیالې سره ولېدل
د ښارجوړولو او ځمکو وزارت سرپرست وزیر محترم محمود کرزي په کابل کې د انګلستان سفارت انکشافي برخې مرستیالې اغلې لیزلي مکګیفن سره په کتنه کې په دوه اړخیزو تخنیکي همکاریو بحث او خبرې وکړې.
د دې کتنې په پیل کې د ښارجوړولو او ځمکو وزارت سرپرست وزیر محترم محمود کرزي په بېلابېلو برخو په ځانګړي ډول د انکشافي پروژو تطبیق کې د انګلستان هېواد له همکاریو مننه وکړه او زیاته یې کړه چې د ښارجوړولو او ځمکو وزارت لویو ملي پروژو په ځانګړي ډول د نوي کابل ښار جوړېدو په برخه کې د انګلستان هېواد تخنیکي همکاري به خورا مهمه او اغیزناکه تمامه شي.
محترم محمود کرزي د منظمو او معیاري ښارونو په وده کې د انګلستان هېواد تجربه بېسارې وبلله او د انګلستان سفارت انکشافي برخې مرستیالې اغلې لیزلي مکګیفن څخه یې وغوښتل چې د انجنیرانو په مسلکي روزولو او همداراز تخنیکي برخه کې دې له دې وزارت سره مرسته وکړي.
ورپسې په کابل کې د انګلستان سفارت انکشافي برخې مرستیالې اغلې لیزلي مکګیفن د ښارجوړولو او ځمکو وزارت سره په دوه اړخیزو تخنیکي همکاریو د ټینګار تر څنګ وویل، هېواد یې په بېلابېلو تخنیکي برخو کې هراز همکارۍ ته چمتو دی او په اړونده برخو کې به خپلې تجربې هم له یاد وزارت سره شریکې کړي.
په پای کې دواړو خواوو یو ځل په ګډ کار او دوه اړخیزو تخنیکي همکاریو ټینګار وکړ.
###
