د کابل ښار په درېیمه ناحیه کې د ودانیزو چارو له بهیر څخه تخنیکي څارنه ترسره شوه
۱۴۴۷/۱۱/۰۵
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست تخنیکي ټیمونو، د منظم او دوامداره نظارتي پروګرامونو په لړ کې د کابل ښار په درېیمه ناحیه کې د ودانیزو چارو له روان بهیر څخه ساحوي تخنیکي څارنه ترسره کړه.
د څارنې په مهال له پل سرخ څلور لارې تر دارالامان عمومي سړک پورې بېلابېلې ساحې تر پوښښ لاندې ونیول شوې.
د څارنې پر مهال د ودانیزو پروژو منظور شوې نقشې د ساحې له موجود وضعیت او نافذه ښاري پلانونو سره پرتله شوې، څو د قانوني او تخنیکي معیارونو د رعایت کچه وارزول شي.
د ارزونې په ترڅ کې هغه پروژې چې د نافذه قوانینو او ښاري پلانونو د احتمالي سرغړونې نښې پکې لیدل کېدې، د لا زیاتې تخنیکي څېړنې لپاره تثبیت شوې. په همدې تړاو د پروژو له مالکینو وغوښتل شول، څو خپل قانوني اسناد، جوازونه او تخنیکي مدارک اړوند ریاست ته وسپاري، ترڅو له دقیقې ارزونې وروسته د تثبیت شویو سرغړونو پر وړاندې لازم قانوني اقدامات ترسره شي.
د ښاري سرغړونو د مخنیوي ریاست ټینګار کوي، چې د څارنو دا لړۍ به د کاري پلان له مخې په دوامداره توګه روانه وي او د ښار نورې ساحې به هم په نږدې راتلونکې کې تر پوښښ لاندې ونیول شي.
د دې څارنو اساسي موخه د ښاري پلانونو سم تطبیق، د غیرمعیاري تراکم مخنیوی، د ودانیزو چارو د کیفیت لوړول او د ښاري مدیریت د بهیر پیاوړتیا بلل کېږي.
