محترم محمد جواد پیکار: بامیان د تاریخي او فرهنګي اصالت په ساتلو سره په یوه ستره عایداتي سرچینه بدلېدای شي
د ښار جوړولو او ځمکو سرپرست وزیر محترم محمد جواد پیکار د بامیان له والي محترم محمد طاهر زهیر سره په خپل کار ځای کې ولیدل او په بامیان کې يې دغه وزارت پورې اړوندو پروژو په اړه تفصیلي خبرې اترې وکړې.
د کتنې په پیل کې د بامیان والي په دغه ولایت کې د غیررسمي ښاري سیمو د ثبت برنامې له بریالي تطبیق او د بامیان انکشافي ماسټر پلان وروستي کېدو له امله د ښار جوړولو او ځمکو سرپرست وزیر له نوښت او پاملرنې څخه مننه وکړه.
نوموړي په ورته وخت کې په بامیان ښار کې د شهیدانو کورنیو لپاره د بابا او ګنبتک ښارګوټو لپاره د ځمکو انتقال، د جر خشک په نوم د ښارګوټي لپاره د ځمکې تصفیې او انتقال، د بامیان پوهنتون او د اتفاق په نوم د ښارګوټي لپاره د ځمکې او د هوايي ډګر د ځمکې تصفیې غوښتنه وکړه.
ورپسې د ښار جوړولو او ځمکو سرپرست وزیر وويل چې په بامیان کې د بابا، جرخشک او ګنبتګ ښارګوټو لپاره د ځمکو انتقال وړاندیز پخوا کابینې ته شوی و، خو کابینې يې بيا د جوړولو لپاره د بامیان تاریخي او فرهنګي اصالت ته په پام لارښوونه وکړه، څو اوسنۍ محدوده ښاري بڼه خپله نه کړي.
محترم محمد جواد پیکار د بامیان له والي وغوښتل چې د بامیان ولایت او د ملګرو ملتونو یونسکو سازمان دې دغه وزارت ته ډاډ ورکړي چې د یادو ښارګوټو په جوړولو سره د بامیان تاریخي او فرهنګي اصالت ته زیان نه رسیږي، څو د هغو د نظریاتو مطابق د ځمکو انتقال په تړاو په کابینې کې پرېکړه وشي.
د ښار جوړولو او ځمکو سرپرست وزیر همد رانګه د بامیان هوايي ډګر او د بامیان پوهنتون او اتفاق ښارګوټي د ځمکو تفکیک او د مالکیت حق تثبیت په پار د جمهوري ریاست عالي مقام حکم پر اساس یاد ولایت ته د تصفیې د پلاوي د لېږلو لارښوونه هم وکړه.
محترم محمد جواد پیکار د خبرو په دوام څرګنده کړه چې د ښار جوړولو او ځمکو وزارت یو شمېر تاریخي جاذبې لرونکو ولایتونو ته د نړیوالو سېلانیانو د ماتولو او له هغو د عایداتي سرچینو په توګه د استفادې طرحې لري. نوموړي بامیان هم یو له همدغو ولایتونو یاد کړ.
د ښار جوړولو او ځمکو سرپرست وزیر وویل، د پراختیايي پروژو د تطبیق دوام د بامیان او د هغه تاریخي ابدې بڼې ته زیان رسولای شي او زياته يې کړه، د بامیان اوسنۍ ښاري محدوده دې د واضح لرلید په رڼا کې وساتل شي چې په دې صورت کې د نوي ښار د جوړولو اړتیا پېښیږي.
محترم محمد جواد پیکار وویل، دې موخې ته د رسېدو لپاره اړتیا ده چې د سیمهییز او مرکزي حکومت په کچه دې د سلا مشورو لړۍ پیل شي، څو مثبتې پایلې ترلاسه شي.
