د ښار جوړولو او ځمکو وزارت او د شهیدانو او معلولینو په چارو کې د دولت وزارت ترمنځ د همکارۍ تفاهملیک لاسلیک شو
په هغه غونډه کې چې په همدې مناسبت د حکومت د اطلاعاتو او رسنیو په مرکز کې ترسره شوه، د ښار جوړولو او ځمکو وزارت او د شهیدانو او معلولینو په چارو کې د دولت وزارت ترمنځ د همکارۍ تفاهملیک لاسلیک شو.
په سر کې، د شهیدانو او معلولینو په چارو کې د دولت وزیر محترم لعل الدین آریوبی د ټولو دولتي ارګانونو د ژمنې او همکارۍ څخه په مننې زیاته کړه چې د یادو تفاهم لیکونو په تطبیق سره به د شهیدانو د کورنیو او د معلولیت لرونکو خلکو په ټولنیز او اقتصادي ژوند کې پام وړ بدلون رامنځته شي.
ورپسې، د ښار جوړولو او ځمکو وزارت مرستیال محترم روښان ولسمل د تفاهملیک د لاسلیک پر مهال وویل چې د ښارجوړولو او ځمکو وزارت مشرتابه د دې تفاهم لیک پر بنسټ د شهیدانو کورنیو او معلولیت لرونکو خلکو ته د ښارګوټو جوړولو، په مرکزي او لایتي کچه تر ۳ سلنه د دوی استخدام، د ښاري پلانونو په طرح او ډیزاین کې معلولیت لرونکو خلکو ته لازم اسانتیاوې او نورمونه په نظر کې نیول او په دولتي ښارګوټو کې د استوګنیزو نمرو او اپارتمانونو په خرڅ کې تر ۳۰ سلنه تخفیف ځانګړي کولو ته ژمنه لري.
دا تفاهملیک د معلولینو د امتیازاتو او حقوقو د قانون او د مفقودینو او د شهیدانو ورثې د حقوقو او امتیازاتو د قانونو د ښه تطبیق، د معلولیت لرونکو خلکو د عمل ملي پروګرام د تطبیق، د دوی په ژوند کې د مثبت تغییر د راوستلو، په دولتي ادارو کې دوی ته د کاري فرصتونو برابرولو، په تعلیمي، سیاسي او ټولنیزو برخو کې د دوی ادغام او په ټوله کې د شهیدانو کورنیو او معلولیت لرونکو خلکو د ملاتړ په موخه ترتیب شوی دی.
د دې تفاهملیک موده درې کاله اټکل شوې چې د اړتیا په صورت کې د دواړو لورو ترمنځ بیا به لاسلیک کیږي.
