د کابل ښار په پنځمه ناحیه کې د قطر د استوګنې د کمپلکس د جوړولو کار روان دی
02/02/1444
د کابل ښار په پنځمه ناحیه کې د قطر د استوګنې د کمپلکس د لومړي فاز د جوړولو کار روان دی او تر اوسه یې شاوخوا ۶۰ سلنه چارې بشپړې شوې دي.
د قطر د استوګنې د کمپلیکس د بلاکونو د جوړولو تړون د الغرافه قطر خیریه مؤسسې او ساختماني شرکتونو ترمنځ د تېر حکومت پر مهال لاسلیک شو او عملي کارونه یې په دې برخه کې پیل کړل، خو د ستونزو له امله یې کارونه وځنډېدل.
د ا.ا.ا له بیا حاکمیت وروسته د ښار جوړولو او ځمکو وزارت د مسؤلینو په هلو ځلو د قطر د استوګنې د کمپلکس ستونزې او ننګونې هوارې شوې او د دغې سترې پروژې کار بیا پیل شو.
دغه استوګنيز کمپلکس په کابل ښار کې يو له مهمو استوګنيزو پروژو څخه ده، چې د جوړولو لګښت يې څه د پاسه ١١٠ ميليونه امريکايي ډالره کېږي او د الغرافه خيريه موسسې له خوا ورکول کېږي.
د الغرافة خیریه مؤسسې د ساختماني چارو د څار مسؤل ښاغلي انجنیر میوند شیرزاد وویل، دا پروژه په درېيو پړاوونو کې جوړېږي او اوس يې په لومړي پړاو کې د جوړېدو چارې روانې دي.
ښاغلي شیرزاد زیاته کړه، چې د دې پړاو په بشپړېدو سره به د پلان له مخې د نورو پړاوونو د جوړولو چارې عملاً پيل شي.
دغه راز هغه وویل، د يو باب جومات د جوړولو کار ٦٠ سلنه، د دوو ښوونځيو د ودانيو د جوړولو چارې ٧٠ سلنه او د درېيو استوګنیزو بلاکونو رغنیزې چارې ٣٥ سلنه پرمخ تللي او اوسمهال په ياده پروژه کې ٧٠٠ کسان په کار بوخت دي.
