د نوي کابل ښار د لومړي فاز د اصلاح شوي جوړښتي پلان د لا ډېر دقت غوښتنه وشوه
۱۴۴۷/۰۴/۲۲
د کور و ښآر جوړولو وزارت د ښاري چارو د محترم مرستیال شیخ مدارعلي کریمي بامیاني، او د مسکن، ودانیزو چارو او د برنامو د پراختیا د محترم مرستیال مولوي ګل زرین صابر، په مشرۍ د یاد وزارت د تخنیکي کمېټې له غړو سره ګډه ناسته ترسره شوه. په دې ناسته کې د نوي کابل ښار د لومړي فاز د اصلاح شوي جوړښتي پلان په اړه هر اړخیز بحث او ارزونه وشوه.
د ښاري چارو محترم مرستیال شیخ مدارعلي کریمي وویل، نوی کابل ښار د وزارت له مهمو او ستراتیژیکو پروژو څخه دی، نو له همدې امله باید د دې پروژې هره برخه په پوره دقت او مسلکي بنسټ ولاړه وي. ده زیاته کړه، په ښار جوړونه کې اساس د ښاري پلان او نقشې پر بنسټ ولاړ وي، دا نقشه باید د یو عصري ښار بېلګه وي چې د سیمې په کچه د نمونې حیثیت ولري.
همدارنګه، د مسکن ودانیزو چارو او د برامو د پراختیا محترم مرستیال مولوي ګل زرین صابر وویل، د وزارت ښاري متخصصین باید په ځانګړي ډول د دې پلان په برخه کې لازمه پاملرنه وکړي، څو یو معیاري، عصري او د راتلونکې اړتیاوو سره سم ښاري پلان وړاندې شي.
په ناسته کې د وزارت د بېلابېلو ریاستونو له استازو جوړه تخنیکي کمېټه، د نوي کابل ښار د جوړښتي پلان په اړه مفصل معلومات وړاندې کړل. هغوی څرګنده کړه چې دا کمیټه د پخواني ماستر پلان، جوړښتي پلان او د څو ښارګوټو تفصیلي پلانونه څېړلي دي. د پخواني پلان په جوړښت کې ځینې تخنیکي نیمګړتیاوې موجودې وې، له همدې امله دا نوی پلان ترتیب شوی، تر څو هغه ستونزې له منځه یوسي.
د ناستې ګډونوالو خپلې نظریې او وړاندیزونه هم شریک کړل او ټینګار یې وکړ چې د جوړښتي پلان بدلونونه د زیربنایي پلانونو په بدلون هم اغېزه لري، نو باید د قوتونو، ضعفونو او محدودیتونو هر اړخ په پام کې ونیول شي.
په ناسته کې پرېکړه وشوه چې د نوي کابل ښار د لومړي فاز په اصلاح شوي جوړښتي پلان باندې لا ډېر دقت وشي، او دغه پلان به د چارو محترم ریاست ته د یو پریزنتیشن (ارزونې غونډې) له لارې وړاندې کېږي، چې پکې به د اړوندو ادارو متخصصین او د کابل پوهنتون د انجینرۍ پوهنځي استادان هم ګډون وکړي.
