ارزګان کې د ښاري سرغړونو پر وړاندې جدي څارنه ترسره شوه
۱۴۴۷/۹/۸
د کور او ښار جوړولو وزارت، له ښاري سرغړونو د مخنیوي او د انکشافي پروژو پر تطبیق د څار محترم عمومي ریاست په همغږۍ، د دغه وزارت د ښاري تخلفاتو د مخنیوي محترم ریاست تخینکي ټیم، د ارزګان ولایت مرکز ترینکوټ اړوند په ټولو ناحیو کې پراخ ښاري نظارت ترسره کړ.
دغه نظارت د ښاري سرغړونو د مخنیوي او د منظور شوو تفصیلي پلانونو د تطبیق په موخه ترسره شوی دی.
د درېیمې ناحیې اړوند، چې د محمد ظاهر شاه د دورې په تفصیلي پلان کې شامل ده، یو تن هڅه کوله په استوګنیزه نمره کې تجارتي ځای جوړ کړي، چې مخنیوی یې وشو.
د کور او ښار جوړولو وزارت د ښاري سرغړونو د محترم ریاست تخنیکي ټیم یاد کس ته د ښاري سرغړونو او مخنیوي په اړه یې لارښوونه وکړه، چې دغه ساحه استوګنیزه ده او باید یوازې د کور جوړولو لپاره ترې استفاده وشي.
له دې سره ورته سپارښتنه وشوه، چې سمدستي پیل شوي ساختماني کارونه ودرول شي.
همدارنګه په همدې ناحیه کې بل کس غوښتل په خپله خوښه په استوګنیزه نمره کې سوداګریز ځای جوړ کړي، چې هغه ته هم سپارښتنه وشوه څو خپل غیرقانوني فعالیتونه ژر تر ژره بند کړي.
د نظارت په ترڅ کې نورو ښاریانو ته هم د ښار د تفصیلي پلانونو په اړه لازم معلومات وړاندې شول.
شنې ساحې، تجارتي زونونه او استوګنیزې سیمې خلکو ته وروپېژندل شوې، څو د پلان مطابق ودانیز فعالیتونه ترسره کړي.
د کور او ښار جوړولو وزارت، دغه اقدامات د یو منظم طرزالعمل له مخې ترسره کېږي، او موخه یې د ښاري نظم ټینګښت، د ناقانونه جوړښتونو مخنیوی او د معیاري ښار جوړولو تضمین دی.
