ښار جوړولو و ځمکو سرپرست وزیر د مالي او اداري معینیت د کړنو رپوټ استماع وکړ

ښار جوړولو او ځمکو سرپرست وزیر محترم محمود کرزي د وزارت معینانو په ګډون په یوه استماعیه غونډه کې د مالي او اداري معینیت د وروستي یو کال مالي او اداري کړنو، وزارت پورې د اړوندو پروژو مالي مسایلو په اړه د کړنو رپوټ واورېده.

په لومړي سر کې مالی او اداري معینې اغلې خاطرې سادات وویل، ښار جوړولو او ځمکو وزارت په ۱۳۹۹ مالي کال کې ۵٫۶ مېلیارډه افغانۍ انکشافي او ۱٫۲ مېلیارډه افغانۍ عادي بودجه لري. مالي او اداري معینې دغه راز په بهرنیو مرستو ولاړو پروژو لکه د کابل دارالامان په نیله باغ سیمه کې د چین په ۷۱ مېلیونه ډالرو د ۱۴۰۰ استوګنیزو واحدونو پروژې او ننګرهار کې د هند په ۲۷ مېلیونه ډالرو د قاسم اباد ښارګوټي پروژې په تړاو هم معلومات وړاندې کړل.

اغلې سادات همدارنګه د ښار جوړولو او ځمکو وزارت په جوړښت کې د نړیوال بانک په مالي ملاتړ د ښارونو پراختیا پروژې (UDSP) او د ځمکوالۍ چارو مدیریت سیسټم پروژې (ALASP) په یادونې زیاته کړه چې دا دواړه د نړیوال بانک په مرسته د ښار جوړولو او ځمکو وزارت په جوړښت کې تر ټولو سترې پروژې دي. نوموړې همدا راز وویل، ښار جوړولو او ځمکو وزارت تېر کال له ټاکل شوي اندازې څخه زیاته اندازه عواید یې د دولت بودجې ته ترلاسه کړي دي.

ورپسې د ښار جوړولو او ځمکو سرپرست وزیر تدارکاتي چارو ته په اشارې وویل، د ټولو ساختماني پروژو تدارکاتي چارې باید په شفاف ډول ترسره شي. محترم محمود کرزي دغه راز یادونه وکړه چې د وزارت او ملي تدارکاتو ادارې کې د ساختماني پروژو تدارکاتي پړاوونو کې ځنډ د پروژو تطبیق لړۍ ټکنۍ کړی ده او اړتیا ده چې ورته حل لارې وموندل شي.

نوموړي وویل، پر یوې داسې طرحې کار وشي چې په تدارکاتي چارو کې په ولایتونو کې دویم واحدونه د صلاحیت څښتن شي، خو ټولو چارې تر جدي څار لاندې او د پروسو په رالنډولو سره سم پر مخ ولاړې شي.

ښار جوړولو او ځمکو سرپرست وزیر د خپلو خبرو په دوام کې په ټینګار سره وویل، دا وزارت د دولت په جوړښت کې عایداتي بنسټ دی او د عوایدو لا ډېروالي لپاره اړتیا ده چې هر راز خدمتونه لکه د ځمکو تثبیت، تصفیې، ډیزاین او مهندسې غوندې دغه شان نورې چارې د ټاکلي بیې په مقابل کې ترسره شي، څو له مالي اړخه د پروژو په تطبیق کې هېڅ راز خنډ منځ ته رانه‌شي.

محترم محمود کرزي د وزارت تشکیلاتو اصلاح په موخه مالي او اداري معینیت ته دنده هم وسپارله چې د ټولو نورو معینیتونو سره په ګډه پر تشکیلاتو بیا کتنه وکړي.

ښار جوړولو او ځمکو سرپرست وزیر وویل، تر دې وروسته دې ټول خالي بستونه د اداري اصلاحاتو او ملکي خدمتونو کمیسیون له لارې اعلان ته وسپارل شي.

محترم محمود کرزي په پای کې د پروژو په تطبیق کې له کورنیو ظرفیتونو پر استفادې ټینګار ترڅنګ زیاته کړه چې تر دې وروسته ټولې اړوندې چارې دې چټکې، څو په لنډه موده کې له هغو مثبته پایله ترلاسه شي.