د موسهي ولسوالۍ د انکشافي پلان په ساحه کې د غیرپلاني جوړونو څارنه وشوه
۱۴۴۸/۴/۲۲
د کور او ښار جوړولو وزارت د کنټرول، کیفیت او ښاري سرغړونو د مخنیوي عمومي ریاست اړوند د ولسوالیو د ښاري انکشافي پلانونو د څارنې آمریت تخنیکي ټیم، د وزارت د مقام د هدایت او د دوامدارو څارنو په لړ کې، د کابل ولایت د موسهي ولسوالۍ د انکشافي پلان په ساحه کې د هغو سرغړونو څارنه ترسره کړه چې د یادې ساحې د څارنې پر مهال تثبیت شوې وې.
د څارنې پر مهال موندل شوې سرغړونې د موسهي ولسوالۍ له مقام سره شریکې شوې او ټینګار وشو چې د نافذه اصولو او قوانینو له مخې دې د انکشافي پلان په ساحه کې د غیرپلاني او خپل سرو ساختماني چارو مخه ونیول شي.
د موضوع له شریکولو وروسته د ولسوالۍ مقام ډاډ ورکړ چې یاد موارد به وڅېړي او د غیرقانوني او غیرپلاني جوړونو د دوام مخنیوی به وکړي.
د دې څارنې موخه د انکشافي پلان په ساحه کې د ښاري سرغړونو تثبیت، د خپلسرو او غیرقانوني ساختماني فعالیتونو مخنیوی او د سیمې اوسېدونکو ته د انکشافي پلان په اړه عامه پوهاوی ورکول دي.
