په فراه ولایت کې د محمدآباد مهاجرینو ښارګوټي د سړکونو د جوړولو چارې پیل شوې
۱۴۴۸/۱/۲۷
د فراه ولایت د کور او ښار جوړولو ریاست په همغږۍ، د محمدآباد مهاجرینو ښارګوټي د سړکونو د جوړولو او هوارولو پروژه، چې د کور او ښار جوړولو وزارت له پراختیایي بودجې څخه تمویلېږي، په رسمي ډول پیل شوه.
د فراه ولایت د کور او ښار جوړولو ریاست د معلوماتو له مخې، په دې پروژه کې د ښارګوټي د ۱۶ سړکونو پاککاري او هوارول شامل دي، چې د راستنېدونکو مهاجرینو لپاره به د تګ راتګ اسانتیاوې برابرې او د ښارګوټي بنسټیزې زیربناوې لا پیاوړې کړي.
ټاکل شوې ده، چې یاده پروژه د پنځه میلیونه افغانیو په لګښت په شاوخوا یوه میاشت کې بشپړه شي، همدارنګه، د پروژې د تطبیق پر مهال به لسګونو کسانو ته د لنډمهاله کار زمینه هم برابره شي.
د کور او ښار جوړولو وزارت ژمن دی، چې د راستنېدونکو مهاجرینو د دایمي مېشتېدنې، د بنسټیزو خدمتونو د پراختیا او د معیاري ښارګوټو د رامنځته کولو په موخه ورته پراختیایي پروژې په دوامداره توګه پلې کړي.
