د بلخ ولایت د حیرتان د دوراهي صنعتي پارک د توپوګرافي نقشې ارزونه وشوه
۰۸/۰۱/۱۴۴۸
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني په خپل کاري دفتر کې د صنعت او سوداګرۍ وزارت د صنعتي چارو له محترم مرستیال مولوي احمدالله زاهد، مل پلاوي او د تاج لند خصوصي ساختماني شرکت له رئیس انجنیر حبیب الله صمدي سره وکتل او د بلخ ولایت د حیرتان د دو راهي صنعتي پارک د توپوګرافي نقشې او تفصیلي پلان په اړه یې خبرې وکړې.
په دې غونډه کې د کور او ښار جوړولو وزارت د ښاري پلان جوړونې یو شمېر انجنیرانو او متخصصینو هم ګډون کړی و، ګډونوالو د حیرتان د دوراهي صنعتي پارک د توپوګرافي نقشې او تفصیلي پلان په اړه بحث او تخنیکي ارزونه ترسره کړه.
یاد اسناد د تاج لند خصوصي ساختماني شرکت له لوري چمتو شوي او د ارزونې او تأیید لپاره کور او ښار جوړولو وزارت ته سپارل شوي دي.
د کور او ښار جوړولو وزارت د ښاري چارو محترم مرستیال وویل، د ښاري پلانونو ترتیب له توپوګرافیکې سروې نیولې تر نقشې او تفصیلي پلان پورې لوړې تخنیکي تجربې او دقت ته اړتیا لري.
نوموړي ټینګار وکړ چې د حیرتان د دوراهي صنعتي پارک تفصیلي پلان باید د عصري او معیاري اصولو له مخې ترتیب شي او د ارزونې پر مهال ټولې نیمګړتیاوې په نښه او د اصلاح لپاره اړوندو لورو ته سپارښتنې کېږي.
په همدې حال کې د صنعت او سوداګرۍ وزارت د صنعتي چارو محترم مرستیال وویل، د حیرتان د دوراهي صنعتي پارک د هېواد له مهمو صنعتي ښارګوټو څخه دی او اړینه ده چې د دې پارک توپوګرافیکه نقشه او تفصیلي پلان په پړاویز ډول د کور او ښار جوړولو وزارت له لوري وارزول او تأیید شي.
د دواړو وزارتونو متخصصینو د توپوګرافیکې سروې د نقشې او تفصیلي پلان اړوند خپل تخنیکي نظرونه شریک کړل او هغه نیمګړتیاوې یې تشریح کړې چې د نقشې او پلان په ځینو برخو کې موجودې دي.
د بحثونو پر مهال ټینګار وشو چې د سروې او توپوګرافیکې نقشې د ستونزو حل د تفصیلي پلان د نیمګړتیاوو د رفع کولو لپاره بنسټیز اهمیت لري.
د تاج لند خصوصي ساختماني شرکت رئیس ژمنه وکړه چې د کور او ښار جوړولو وزارت او د صنعت او سوداګرۍ وزارت په همغږۍ به موجودې نیمګړتیاوې اصلاح کړي.
د غونډې په پای کې پرېکړه وشوه چې په لومړي پړاو کې به د حیرتان د دوراهي صنعتي پارک د توپوګرافیکې نقشې ستونزې او نیمګړتیاوې د اړوندو ادارو په همکارۍ اصلاح شي او له هغې وروسته به د تفصیلي پلان د ارزونې او تأیید په اړه لازم تصمیم ونیول شي.
