د کابل ښار په لومړۍ ناحیه کې د ښاري تخلفاتو څارنه ترسره شوه
۱۴۴۷/۱۰/۱۵
د ښاري تخلفاتو د مخنیوي او د پروژو پر تطبیق د څار عمومي ریاست اړوند تخنیکي ټیمونو له لوري، د کابل ښار په لومړۍ ناحیه کې ساحوي څارنه ترسره شوه.
دغه څارنه د کور او ښار جوړولو وزارت د هدایت پر بنسټ ترسره شوه، چې موخه یې د ښاري اصولو د تطبیق ارزونه او د سړک د حریم د کارونې څېړنه وه.
د څارنې په ترڅ کې، د باغ عمومي له پل څخه تر پل خشتي پورې سنګفرش شوی سړک وکتل شو، څرګنده شوه چې په ځینو برخو کې پلې لارې د دوکانونو او لاس پلورونکو له لوري اشغال شوې او د سړک له حریم څخه ناسمه استفاده شوې، چې د عابرینو تګ راتګ او ترافیکي نظم یې اغېزمن کړی دی.
همدارنګه، د وسایطو غیرقانوني درول، د سړک د سطحې ناهمواري او د کثافاتو موجودیت هم د ستونزو له جملې څخه وبلل شول.
ټینګار وشو چې د پلې لارو اشغال مخه ونیول شي، د سړک حریم په سمه توګه وکارول شي او د ښاري قوانینو د تطبیق لپاره لازم اقدامات ترسره شي.
