په هرات کې د شینډنډ ښاروالۍ د کانال له کارونو څارنه وشوه
۱۴۴۷/۱۰/۰۸
د هرات ولایت د کور او ښار جوړولو ریاست اړوند تخنیکي ټیم د شینډنډ ولسوالۍ د ښاروالۍ ودانۍ اړوند د دوه طرفه کانال د جوړولو له بهیر څخه تخنیکي څارنه ترسره کړه.
د معلوماتو له مخې، دغه څارنه د شینډنډ ولسوالۍ د ښاروالۍ د مکتوب پر بنسټ ترسره شوې، چې په ترڅ کې یې د یاد کانال د جوړولو چارې له نږدې وارزول شوې.
د ارزونې پر بنسټ، د کانال کارونه د پروژې له تخنیکي نقشو او ټاکل شوو مشخصاتو سره سم، په ساحه کې په معیاري او باکیفیته ډول تطبیق شوي دي.
د څارنې پر مهال ټینګار وشو چې د ترسره شوې پروژې ساتنه او مراقبت باید په جدي او دوامدار ډول ترسره شي، څو د هغې دوام او اغېزمنتیا تضمین شي.
دغه څارنه د کور او ښار جوړولو وزارت، له ښاري سرغړونو د مخنیوي او د پروژو پر تطبیق د څار محترم عمومي ریاست په لارښوونه ترسره شوه.
ټاکل شوي تخنیکي پلاوي څرګنده کړه چې د ورته بنسټیزو پروژو معیاري تطبیق د ښاري خدمتونو د ښه والي او د عامه تاسیساتو د دوام لپاره مهم ارزښت لري.
